Albistea entzun

Aurrekontuak

Nafarroako Gobernuak eta EH Bilduk akordioa lortu dute aurrekontuei buruz

Oraindik ere ez da erabateko akordioa, eta zerga neurrien inguruan ados jartzea falta dela azpimarratu du Bakartxo Ruizek. Haren esanetan, «akordioa osoa izan arte» ez dute xehetasunen berri emango. Gobernua baikor azaldu da 2022an aurrekontuak izateko bidean.

Bakartxo Ruiz, parlamentuan, eta atzean Maria Txibite gobernuko lehendakaria, ekainean.
Bakartxo Ruiz, parlamentuan, eta atzean Maria Txibite gobernuko lehendakaria, ekainean. Idoia Zabaleta / Foku Tamaina handiagoan ikusi

Joxerra Senar -

2021eko urriak 27 09:45

Asteartean, udal arloko finantzaketaren akordioa, eta asteazkenean, aurrekontuen aurreproiektua. Nafarroako Gobernuak eta EH Bilduk akordioa lortu dute legealdi honetan hirugarren urtez jarraian Nafarroak aurrekontuak izan ditzan. Bileratik aterata, Bakartxo Ruiz EH Bilduko eledunak nabarmendu du akordioa «partziala» dela, eta oraindik ere hainbat kontu falta direla adosteko: hala nola zerga neurriak. Javier Remirez eta Jose Mari Aierdi gobernuko bi presidenteak ere pozik azaldu dira: «Akordioak pentsarazten digu urte amaieran aurrekontuak izango ditugula».

Azken bi asteetan, komunikabideen aurrean hiru aldiz bildu dira koalizio abertzalea eta gobernua. Atzoko bilerara 16:30ean zegoen deituta, eta hura amaitutakoan iragarri du Ruizek aurreproiektuaren inguruko akordioa lortu duela. Haren esanetan, «pauso bat gehiago» eman dute aurrekontuen eta zerga neurrien gaineko akordio oso bat izateko. «Atzo adierazi genuen udalen finantzaketa arloko akordioak bidea errazten zuela aurrekontuen inguruan akordioa lortzeko, eta gaur esan dezakegu gertatu dela».

Ruizen arabera, oraindik ere urrun daude zergen arloan, eta negoziatzen jarraituko dute. Iazko akordioaren ondotik, gobernuak sozietate zergako kenkari batzuk aztertzeko azterketa egin du, eta, haren emaitzak ikusirik, EH Bilduk argi adierazi zuen inbertsio zein enplegu arloko kenkariak kendu egin behar direla. Gobernuak lasaitasuna eskatu izan du, eta litekeena da puntu horietan desadostasunak izatea.

Aurrekontuaren akordioari dagokionez, Ruizek ez du zehaztu zer puntu adostu dituzten: «Gobernuarekin ados jarri gara neurri zehatz batzuk, lehentasun batzuk eta diru sail konkretu batzuk ezartzeko, Guretzat garrantzitsuak ziren, eta gobernuak ulertu du bat egiten zutela bere lehentasunekin», adierazi du.

Ruizek espero du akordioa osorik lortzea, eta orduan emango dute orain lortutakoaren berri. «Oraindik ez dago akordio bat osorik, ez dago sinatutako dokumenturik, eta, beste batzuetan esan izan dugun bezala, une hori iristen bada, argi eta garbi, gardentasun osoz, argitaratuko dugu haren edukia»

Gobernuaren balorazioa

Ruizen ostean, Javier Remirezek eta Jose Mari Aierdik hitz egin dute. Presidenteordeen esanetan, bileran «aurrerapauso esanguratsuak» eman dituzte. Nahiz eta oraindik urratsak falta diren, gaurko kontseiluan 2022ko aurrekontuen aurreproiektua onartuko du gobernuak. Behin hori eginda, edukia gizarte eragileei, tokiko erakundeei eta ingurumen arloko eragileei pasatuko zaie. Haien eskutik pasatuta, lege proiektua onartuko luke gobernuak, eta ondoren parlamentura igorri. Ikusteko dago gobernua EH Bildurekin ados jarriko ote den lege proiektua onartu aurretik, edo zatikako zuzenketa bidez emango ote zaien bidea aurrekontuei.

Jose Mari Aierdik zehaztu du parlamentuan egin beharreko bide horren gainean ere hitz egin dutela EH Bildurekin, baina, tramitazioari begira, baikor azaldu da gobernua. «Pentsarazten digu urte amaierarako herritarren beharrei erantzuteko instrumentu baliagarri bat izan dezakegula». Aurreproiektuaren inguruko xehetasunak bihar emango ditu Elma Saiz Ekonomia eta Ogasun kontseilariak.

Aurreko urteetako negoziazioa baino zailagoa den galdetuta, Remirezek azaldu du ez dela izan ez zailagoa ez eta errazagoa ere. «Iazko aurrekontuak pandemiak baldintzaturik egin ziren; orain beste erronka batzuk ditugu, eta, aurreko bi aurrekontuekin alderatuta, egoera erabat diferentea da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Joan den urrian euskal presoen eskubideen alde Donostian egindako manifestazioa. ©JON URBE / FOKU

Bertze bortz euskal preso Euskal Herriratuko dituzte

Maddi Ane Txoperena Iribarren

Lexuri Gallastegi, Zigor Blanco, Gorka Lupiañez, Jose Maria Novoa eta Ion Troitiño dira Euskal Herrira ekarriko dituzten euskal presoak. Eusko Jaurlaritzak zehaztu beharko du zein kartzelatara mugitzen dituzten.

Durangoko Jesuiten eliza, bonbardatu zuten egunean. ©GEREDIAGA ELKARTEA

Memoriak galdu zituen paperak

Jone Arruabarrena

Durangoko bonbardaketaren ondoren, 84 hildako sartu zituzten bi hobi komunetan. Handik egun batzuetara, lurperatuen zerrenda desagertu zen. Hildakoen senideen bila dabiltza orain.

Anjel Lekuona —eserita—, 1940 inguruan, hiru kiderekin. ©ANTON GANDARIAS

Naziek erretako osabaren errautsak

Javi West Larrañaga

Anjel Lekuonaren bideari segitu dio iloba batek; 36ko gerrako jazarpenetik ihesi, Espainiako errepublikaren alde aritu zen Katalunian, eta nazien aurka Frantzian. Haren errautsak Pragan azaldu dira, hilerri batean.
Asier Guridiren askatasuna eskatzek 2013an egindako elkarretaratze at ©Marisol Ramirez / Foku

Asier Guridik baieztatu du errefuxiatu estatusa lortu duela

Berria

Venezuelan dagoen euskal iheslariak gose greba abiatu zuela jakinarazi zuen abenduaren 3an, eta Caracasko Espainiako kontsulatuaren aitzinean plantatu zen.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.