Abuztuan andre bati sexu eraso bat egin izana leporatu diote azaroaren 22an Berriozarren (Nafarroa) arrazoi beragatik atxiloturiko 40 urteko gizonezkoari. Azaroan, merkataritza gune batean emakumezko bati eraso egitea leporatuta atxilotu zuen Poliziak gizona. Berriki, Espainiako Poliziak jakinarazi du joan den abuztuan gertatutako sexu eraso batengatik ere identifikatu dutela, erruduna delakoan.
Polizia iturriek emandako informazioaren arabera, 22:00 aldera gertatu zen erasoa, abuztuko egun batean. Biktima etxera bidean zen, gizonezkoak atzetik egin zion eraso, eta hainbat ukitu egin zizkion emakumezkoari. Andreak ihes egitea lortu zuen, eta salaketa aurkeztu zuen polizia etxean. Ordea, orduan egindako ikerketak ez zuen erdietsi argitzea nor izan zen erasotzailea. Berriz, azaroko atxiloketaren ondotik, gizonezko hori bera bi eraso horien errudun den susmoa du Poliziak.
