Maria Lizarraga eta Iñigo Gutierrez euskal presoak gaur ekarri dituzte Zaballako espetxera (Araba), Aranjuezetik (Madril, 520 kilometro). Espainiako Espetxe Erakundeek joan den abenduaren 30ean iragarri zuten biak Euskal Herriratuko zituztela, eta joan den ortziralean Gutierrezi hirugarren graduan ateratzen utzi zioten, astebururako. Bada, Etxerat-ek gaur jakinarazi duenez, hemendik aitzina Lizarraga Zaballako espetxean edukiko dute, eta Gutierrez, berriz, Zaballako gizarteratze zentroan, hirugarren graduan.
3 urte bete berri dituen Izadi umearen gurasoak dira Lizarraga eta Gutierrez. Adin horretara ailegatu arte amarekin egon da umea espetxean, baina igandean banandu behar izan zuen harengandik, Espainiako espetxeetako araudiak hala aginduta.
Lizarraga eta Gutierrezen lekualdatzeekin, dagoeneko 82 dira Euskal Herriko kartzeletan dauden euskal presoak. Bertze 11 noiz Euskal Herriratuko zain daude; lekualdatzeak iragarrita.
