Albistea entzun

Energia

Macronek sei erreaktore nuklear berri agindu ditu 2035. urterako

Itsasoko 50 parke eoliko jarri nahi ditu 2050erako, eta hamar aldiz handitu potentzia fotovoltaikoa

Emmanuel Macron, General Electricen Belforteko turbina nuklearren lantegian, gaur.
Emmanuel Macron, General Electricen Belforteko turbina nuklearren lantegian, gaur. Jean-Francois Badias / Efe Tamaina handiagoan ikusi

Iker Aranburu -

2022ko otsailak 10

Emmanuel Macron Frantziako presidenteak handitu egin du energia nuklearraren aldeko apustua. Iragarri du beste sei erreaktore nuklear egingo dituztela, 2028an hasita eta 2035. urtean martxan izateko. Gainera, agindu du inbertsio handiak egingo dituela energia berriztagarrietan: itsasoko 50 parke eoliko jarri nahi ditu 2050. urterako (40 GW), bikoiztu egin nahi ditu lurreko parke eolikoak, eta energia fotovoltaikoan instalatuta dagoen potentzia oraingoa halako hamar izatea bilatuko du (100 GW).

Ikusteko dago zer gertatuko den iragarpen horiekin, presidentetzarako hauteskundeen atarian baitago Frantzia. Ofizialki Macron ez da oraindik hautagaia, baina bai faborito argia boz horiek irabazteko. Inkestetan aukera duten gainontzeko hautagaiak eskuindarrak dira, eta nuklearraren defendatzaile sutsuak.

Macronek baztertu egin ditu soilik iturri berriztagarriekin argindar hornidura ziurta dezatela diotenen argudioak: «Aditu bakar batek ere ez du esaten posible dela. Errealitateak, kontrara, erakusten digu aldi berean bi oinarri behar ditugula [berriztagarriak eta nuklearra]. Ekologikoki eta ekonomikoki egokiena da».

Halaber, Macronek EDF argindar konpainia publikoari eskatu dio ahalik eta gehien luza dezala bere erreaktore nuklearren bizitza. Iragarpen horrekin argi erakutsi du alde batera utzi duela agintaldiaren amaieran hamalau zentral nuklear ixteko plana. Bi erreaktore bakarrik itzali dituzte, Fessenheimen (Alsazia).

Frantzia da Europako Batasunean nuklearraren alde apustu garbiena egin duen estatua. Gaur egun 56 erreaktore ditu, hemezortzi zentraletan banatuta. Horietatik hamahiru itxita ditu orain, herdoiltze arazoak dituztelako.

EPR modeloaren arazoak

Macronek agindu dituen sei zentral nuklear berriak EPR modelokoak dira. Belaunaldi berri horretako zentral bakarra egiten ari dira orain, Flamanvillen (Normandia). Arazoak besterik ez du sortu proiektuak: 2007an hasi zuten, eta 2012an amaitu nahi zuten, baina irekiera data 2024ra atzeratu dute jada. Gainkostuak izugarriak izan dira: 3.000 milioi euro kostatu behar zuenak 20.000 milioi inguruko prezioa du dagoeneko.

Gainera, mila milioi euroren inbertsioa agindu du SMR erreaktore nuklear txikiak garatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

CCOO, LAB eta UGT sindikatuen protesta bat, pasa den abenduan ©Oskar Matxin Edesa (Foku)

Bizkaiko metaleko lan itunean sindikatuetako afiliatuek izango dute azken hitza

Jokin Sagarzazu

CCOOk, LABek eta UGTk begi onez hartu dute Eusko Jaurlaritzaren bitartekaritzaren proposamena. 2022-2025eko eperako %15eko soldata igoera metatua jasotzen du. ELA aurka azaldu da.

Gasteizko Eroski supermerkatuko irudi bat. ©Jaizki Fontaneda / FOKU

Inflazioak %5,8ra egin du gora urtarrilean

Iñaut Matauko Rada

Erregaiak garestitu izanak handitu du batez ere inflazioa, nahiz eta oinarrizko elikagaien prezioek behera egin duten, BEZaren jaitsieragatik.

Nissan eta Renaulten logoak, Bruselan, autoen erakuketa batean ©STEPHANIE  LECOCQ

Nissanek eta Renaultek euren arteko aliantza berritu dute

Maddi Iztueta Olano

Akordioan jasotakoaren arabera, aurrerantzean Nissanen kapitalaren %15 izango du Renaultek. Orain arte, horren %43 zuen.

Langile bat Fagor Ederlanek Bergaran duen lantegian ©Andoni Canellada / FOKU

Kontratu mugagabeak igo egin dira iaz, baina lanaldirik prekarioenetan

Olatz Silva Rodrigo

ELA sindikatuaren arabera, lan erreformaren lehen urtean Hego Euskal Herrian sinatutako kontratuen %76 aldi baterakoak izan dira. Aldizkako kontratu finkoak, berriz, 5.545 ziren hasieran, eta 59.220 dira orain.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...