Atzerako kontuaren hondarrean lortu dute gobernu akordioa Gaztela eta Leonen (Espainia). Alfonso Fernandez Mañueco Gaztela Leongo PPren zerrendaburuak goizean iragarri du PPk eta Voxek erdietsi dutela adostasuna. Ciudadanos hondoratua zenez gero, PPk Vox zuen eskuin akordio baterako lagun posible bakarra, eta, azkenik, lortu dute ados jartzea; bien arteko koalizio gobernuak izanen du agintea, hortaz.
Voxeko iturriek zabaldutako informazioaren arabera, PPk Voxen esku utziko ditu bai Gaztela eta Leongo Gobernuko presidenteordetza, bai hiru departamentu, bai eta Gaztela eta Leongo Ganberaren presidentetza ere; Carlos Pollanek hartuko du kargu hori.
Bi alderdien arteko bileraren ondotik Twitterren idatzitako mezu batean, Mañuecok adierazi du bi aldeek osatuko duten koalizio gobernua «egonkorra eta sendoa» izanen dela, eta zehaztu «erabateko errespetua» izanen dietela Gaztela eta Leongo Autonomia Estatutuari eta ordena konstituzionalari.
