Etxerat euskal presoen senideen elkarteak jakinarazi duenez, Jon Gurutz Maiza preso etxarriarra (Nafarroa) Euskal Herriratu egin dute. Lannemezanen zegoen preso (Frantzia, 330 kilometro), eta Martutenen egonen da orain, Donostian. Maizak 71 urte ditu, eta hamalau urte eta erdi daramatza kartzelan. Eritasun larriak dituzten euskal presoen zerrendan dago, halaber.
Etxerat-ek azaldu du zortzi hilabete falta zitzaizkiola Frantzian ezarritako zigorra betetzeko, eta legeak jasotzen duen gisan kondena bete arte Euskal Herrira ekartzea eskatu zuela. Espainiako Auzitegi Nazionaleko bertze errekerimendu batzuen bilakaeraren zain dago.
