Guardia Zibilak gizonezko baten hilotza atzeman du Bidasoa ibaian, Irun (Gipuzkoa) inguruan. Gizonezko batena da. Polizia iturriek oraindik ez dute eman informazio gehiagorik, baina ikertzen ari dira martxoaren 12an desagerturiko migrantearena ote den. Izan ere, hura desagertu zen tokitik hurbil aurkitu dute hilotza. Poliziak erantsi du gorpua deskonposatze fase aurreratuan dela. Ur azalean atzeman dute.
Ikusi gehiago: Behobiako zubia itxi dute, «denentzako» korridore humanitarioak eskatzeko
Larrialdi zerbitzuek martxoaren 17an utzi zioten migratzailea aurkitzeko bilaketa lanetan jarduteari. Gizonezkoa desagertu eta bost egunera, alegia. Hala eta guztiz ere, ikerketa ez zen guztiz eten, eta Guardia Zibilak miaketa lanetan jarraitu du tarteka.
Ibaian gorpu bat aurkitu dutela zioen albistea zabaldu eta gutxira, kasuari buruzko adierazpenak egin ditu Irungo alkate Jose Antonio Santanok. «Min eta tristura sakona» dituela adierazi du, eta erantsi du «dituzten baliabide guztiak» eskainiko dituztela laguntzeko. «Babesa, elkartasuna eta kariñoa» azaldu dizkie hildakoaren hurbilekoei.
