Albistea entzun

EAEko Hezkuntza Legea

Hezkuntza akordioaren aurka protesta egin dute Eusko Legebiltzarreko atarian

Steilasek eta Euskal Eskola Publikoaz Harro plataformak antolatu dituzte protestak, sare publikoaren defentsan. Steilasek lanuztera deitu du gaur ikastetxe publikoetan eta Haurreskolak partzuergoko zentroetan, eta, adierazi duenez, lanuzteak «%100eko eragina» izan du.

Steilasek Eusko Legebiltzarraren parean deituko protesta
Steilasek Eusko Legebiltzarraren parean deituko protesta Berria Tamaina handiagoan ikusi

Edurne Begiristain -

2022ko apirilak 7 14:56

Egun seinalatua da gaur hezkuntza itunaren tramitazioan: Eusko Legebiltzarreko osoko bilkurak behin betiko onetsiko du akordioa, eta, hemendik aurrera, testu hori oinarri hartuta EAEko Hezkuntza legearen egitasmoa ontzen hasiko da Eusko Jaurlaritza. Baina testu horrekiko oso kritiko agertu dira Steilas sindikatua eta Euskal Eskola Publikoaz Harro plataforma, eta protestara deitu dute goizean goizetik Eusko Legebiltzarraren atarian. Sare publikoaren aldeko protestara deitu dute, uste baitute akordioak sistema duala betikotu egiten duela eta ez duela sare publikoa lehenesten.

Steilasek elkarretaratzera deitu du goizean, eta ehunka lagun batu dira Ez saldu euskal eskola publikoa leloa zuen pankartaren atzean. Parte hartzaileek Eusko Legebiltzarraren eraikina inguratu dute publikoaren eta murgiltze ereduaren aldeko oihuen artean. Goizean, gainera, sindikatuak hiruzpalau orduko lanuztera deitua zuen ikastetxe publikoetan eta Haurreskolak partzuergoko zentroetan. Nagore Iturrioz bozeramaileak esan du lanuzteak «erantzun zabala» izan duela, eta gaurkoa mobilizazioen lehenengo urrats bat dela, gehiago etorriko direla. Sindikatuak emandako datuen arabera, lanuzteak «%100eko eragina» izan du ikastetxe publikoetan eta Haurreskolak patzuergoan. «Ikastetxe denetan izan da nabaria, maila handiagoan edo txikiagoan», esan du sindikatuak ohar batean.Lanuztearen harira, Steilasek salatu du Eusko Jaurlaritzak eta Haurreskoletako gerentziak ezarritako gutxieneko zerbitzuak «gehiegizkoak»izan direla, eta ez dutela langileen greba eskubidea bermatu. «Haurreskolak partzuergoari dagokionez, ordutegien ondorioz ia-iaezinezkoa izan da bertan lanuztea egitea», sindikatuak salatu duenez.

Eusko Legebiltzarraren parean egindako protestan, berriz, Iturriozek azaldu du ez daudela ados hezkuntza itunarekin: «Abiapuntua okerra da, bi sareak berdintzen dituelako hein handi batean, eta ez duelako euskal eskola publikoaren aldeko apustu irmo bat egiten». Erantsi du euskal eskola publikoari «duintasuna» eman nahi diotela, eta aurrerantzean borrokan jarraituko dutela.

Steilasek baino ordu erdi lehenago, elkarretaratzera deitu du Euskal Eskola Publikoaz Harro Plataformak ere. Salatu dute akordioak hezkuntza pribatua lehenetsi eta sistema duala «betikotzen» duela. «Sare pribatuaren finantzaketa handitzeko joera garbia ikusten dugu, ezin dugu ontzat eman», esan dute. Akordioak euskararen inguruan egiten duen proposamena murgiltzen eredutik aldentzen dela salatu dute, halaber. Eta iragarri dute jarraituko dutela mobilizatzen euskal eskola publikoaren defentsan. Maiatzean iragarriko dituzte mobilizazio berriak.

ELAren kritika
Bestalde, ELAk ohar batean adierazi du «etsigarria» dela alderdien helburu bakarra izatea akordiorako gaitasuna erakustea: «Funtsezko gaietan benetako aldaketak adostu ez arren, hobekuntza nabariak egin dituzten itxurak egin dituzte». Sindikatuak uste du egungo hezkuntza sistema «betikotzeko» proposamena dela adostutakoa. Gainera, dena berdin uzteko bi bide erabiltzea egotzi die alderdiei: batetik, «literatura eta abstrakzioa» erabiltzea edukiak bakoitzak «nahi bezala» interpretatu ahal izateko; eta, bestetik, legean adosterik izango ez dituzten gaiak legea onartu eta gerorako arautegi batera bideratu dituztela.

ELAk uste du legearen helburuak zera izan behar duela, sare bakarreko «hezkuntza sistema propioa, euskalduna, publikoa, inklusiboa eta plurala» lortzea, zeinak langileen lan baldintza egokiak bermatuko dituen. Sindikatuak salatu du, ostera, Hezkuntza akordioak ez duela xede bera, eta lau alderdiei leporatu die «marko arautzaile eta kurrikular propio» bati uko egitea.

Datozen hilabeteetan, ELAk batzarrak egingo ditu eskoletan gaia aztertzeko, eta elkarlana bilatuko du mobilizazioak eta grebak bultzatzeko prest dauden eragileekin.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ertzaintzaren Irungo komisaria. ©GORKA ESTRADA / EFE

22 urteko gizon bat atxilotu dute Irunen, sexu eraso bat egiteagatik

Iñaut Matauko Rada

Goizeko ordu txikitan jazo da, herriko aparkaleku batean. Ertzaintzak sexu eraso bat egitea egotzi dio 22 urteko gizonari.

Mauleko mainfestazioa, gaur. ©Guillaume Fauvea

Etxebizitza espekulazioaren aurka mobilizatu dira Maulen

Oihana Teyseyre Koskarat

Etxe agentzietan itzuli bat osatuz egin dute protesta, XEKK Xiberuko Espekulazioaren Kontrako Kolektiboak antolatuta.

Donostiako erdialdeko kaleetan ibili dira manifestariak. ©IDOIA ZABALETA / FOKU

Zezenketen aurka mobilizatu dira Donostian

Iñaut Matauko Rada

Gipuzkoako Plataforma Antitaurinoak deituta, ehunka pertsonek Aste Nagusian Donostian egingo diren zezenketak gaitzetsi dituzte.

Manifestazioa, gaur, Donostian. ©Itaia Donostia.

Ziztada bidezko erasoak salatu, eta indarkeria matxistaren aurka antolatzera deitu dute

Berria

Itaiak manifestazio bat egin du Donostian, 'Ziztadarik ez. Erasoen aurrean babesa antolatu' lelopean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...