Berea da, azkenik. Munduko pertsonarik aberatsenak, Elon Muskek, Twitter konpainia erosi du, 44.000 milioi dolar ordainduta –40.000 milioi euro dira hori–. Administrazio kontseiluak onartu egin du enpresariak eginiko lehenbiziko eskaintza. Hala, aurrerantzean Muskena izanen da txori urdinen gaineko kontrola.
Jakina zen Elon Muskek zer asmo zuen. Hitzez ez ezik, eginiko erosketetan ere agerikoa zen helburua. Twitterren akzioen %9,1 bereganatu ditu azken asteotan. Are, behin hori lorturik, konpainiaren kudeatzaileek eskaini egin izan diote administrazio kontseiluan parte hartzea. Ordea, Muskek ez zuen aski horrekin; kontrol osoa bereganatzea izan du desio prozesua abiatu zuenetik.
Ikusi gehiago: Iker Aranbururen 'Bakarrizketa' zutabea: Bateria berriak txori urdinari
Gainera, enpresaburuak argiki azaldu du zer lortu nahi duen: «Mundu osoko adierazpen askatasunaren plataforma» bihurtu nahi du Twitter, erosketa akordioa erdietsi aurretik eginiko adierazpenen arabera.
Hain zuzen, antzeko mezua iradoki du dagoeneko berea den sare sozialean. Honela dio: «Espero dut nire kritikari gogorrenak ere Twitterren gelditzea, horrek esan nahiko baitu adierazpen askatasuna dagoela»
I hope that even my worst critics remain on Twitter, because that is what free speech means
— Elon Musk (@elonmusk) April 25, 2022
Elon Muskek konpainia erosteko eginiko proposamenean jasotakoaren arabera, enpresariak tituluko 54,2 dolar ordaindu beharko dizkio, dirutan, Twitterren akziodun bakoitzari.
