Albistea entzun

Energiaren garestitzea

Gasolina litroa bi euro baino garestiago saltzen dute Euskal Herriko gasolindegien herenek

Astebetean bost zentimo igo da gasolinaren bataz besteko prezioa Hego Euskal Herrian. Gasolioa lau zentimo merkatu da maiatzean Iparraldean, eta hiru Hegoaldean. Depositua betetzea duela urtebete baino 28 (E-95) eta 36 (A gasolioa) euro garestiagoa da.

Donostiako gasolindegiko bat, apirilaren 1ean, Espainiako Gobernuaren hobaria indarrean sartu zen egunean. /
Donostiako gasolindegiko bat, apirilaren 1ean, Espainiako Gobernuaren hobaria indarrean sartu zen egunean. / Jon Urbe/Foku Tamaina handiagoan ikusi

Jon Ordoñez Garmendia -

2022ko maiatzak 20 13:19

Abendutik gasolinaren prezioak izan duen gorakadak ez du etenik. Frantziako eta Espainiako Gobernuek urte hasieran hartutako neurriek erabiltzaileei arnasa pixka bat eman zieten arren, berriro hartu du gorako joera, eta martxotik hona batez beste hamar zentimo garestitu da Euskal Herrian, 1,809 eurotik 1,909 eurora. BERRIAren erregaien prezioaren orrialde berezian ikus daitekeenez, abendutik hona 53 zentimo garestitu da gasolina mota hori litroko. Igoera maiatzean handitu da. Astebetean, maiatzaren 13tik, bost zentimo igo da (0,053 euro), eta atzo Euskal Herrian E-95 gasolina saltzen duten 539 gasolindegietatik 193tan (%35,8) bi euro baino garestiago zegoen jada litroa.

Kopuru horiekin esan liteke Espainiako Gobernuak apirilean ezarri zuen hogei zentimoko hobariaren erdia petrolio konpainiek irentsi dutela jada. E-95 gasolina litroa bi eurotik gorako prezioan saltzen duten 193 gasolindegi horietatik 186 Hegoaldean daude. Ipar Euskal Herrian martxoan hasi zen nabaritzen Frantziako Gobernuaren neurrien eragina. Bost astean 1,971tik 1,780ra jaitsi zen E-95 gasolinaren salneurria. Hortik aurrera, baina, garestitu egin da, eta orain 1,907 euroan saltzen da litroa, martxoaren hasieran zuen salneurri berean.

Orain, E-95 gasolina toki hauetan dago garestien: Bidaxunen (2,13 euro, Nafarroa Beherea), Orontzen (2,12, Nafarroa), Donibane Lohizunen (2,109, Lapurdi), Baionako Nafarroako Herni etorbidean (2,105), Itzan (2,099, Nafarroa), Beasainen (2,089, Gipuzkoa) eta Gernika-Lumon (2,084, Bizkaia). Merkeen, berriz, Etxarri-Aranatzen (1,809 euro, Nafarroa), Zeanurin eta Lemoan (1,799, Bizkaia), Amendüze-Unason (1,774, Nafarroa Beherea), Baionako Grand Basque etorbidean (1,675), Hendaian (1,66, Lapurdi), Angelun (1,549, Lapurdi) eta Senperen (1,335, Lapurdi).

Gasolioa merkatu egin da

E-98 gasolina ere nabarmen garestitu da. Hego Euskal Herriko batez besteko prezioak maiatzean gainditu zuen bi euroen langa, eta ez da hortik jaitsi; atzo 2,104 euroan zegoen. Gasolinaren prezioak gora egin du, eta A gasolioa, berriz, merkatu egin da, eta gasolina baino merkeago dago berriro Euskal Herrian: 1,891 euroan dago A gasolioa, eta 1,948 euroan E-95 gasolina. Iparraldean lau zentimo merkatu da azken hamar egunetan. Hegoaldean, berriz, hiru zentimo.

Europako Batasuna Errusiako petrolioa bahitzea ari da aztertzen, eta, adituen arabera, horrek eragin du maiatzeko igoera. Ikusteko dago zer gertatzen den ekainera bitartean, Hego Euskal Herrian ekainaren 30ean amaituko baita Espainiako Gobernuaren hobaria. Une honetan prezio horiei hogei zentimoko beherapena egiten zaie Hegoaldeko gasolindegietan: hamabost Espainiako Gobernuaren kontura, eta bost petrolio konpainien kontura.

Salneurri horietan, 55 litroko edukiera duen auto batean depositua E-95 gasolinarekin betetzea duela urtebete baino 28 euro garestiagoa da. Ipar Euskal Herrian, iazko maiatzetik, E-95 gasolina 31 zentimo garestitu da litroko, eta Hegoaldean, 0,54 zentimo (Madrilen beherapena aintzat hartu gabe). Gasolioa gehiago garestitu da urte honetan, eta 55 litroko depositu bat betetzea duela urtebete baino 36 euro garestiagoa da. Urtebeteko igoera 49 zentimokoa izan da Ipar Euskal Herrian, eta 68 zentimokoa Hegoaldean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

UGT sindikatuaren mobilizazio bat Bilbon, joan den apirilean. ©UGT

Langile bat hil da Zornotzan, pala bat gainean erorita

Julen Otaegi Leonet

13:00 aldera jazo da ezbeharra, Zornotzako Aludium lantegian (Bizkaia). UGTk elkarretaratzera deitu du uztailaren 6rako.

Metalgintzako grebalariek Bilbon eginiko manifestazioko lau partaide. ©Miguel Toña / EFE

Bizkaiko metalgintzak ez du baztertzen grebekin jarraitzea udazkenean

Imanol Magro Eizmendi

Hirugarren greba eguna aurrekoak baino arrakastatsuagoa izan da, sindikatuen arabera. FVEMek, aldiz, %24ra murriztu du haren jarraipena

Mercedeseko langileek bi pankarta eraman zituzten manifestazioan. ©JAIZKI FONTANEDA / FOKU

Gasteizko Mercedesen hirugarrenez eten dute ekoizpena ekain honetan

Aitor Biain

Sindikatu guztiek elkarrekin egin dute grebarako deialdia bigarrenez, eta erantzun handia izan du. Negoziazioei berrekiteko eskatu diote zuzendaritzari. Jaurlaritzak uste du egoera kezkagarria dela

Ogasunek nekez berreskuratzen duten zorra

Ogasunek nekez berreskuratzen duten zorra

Iker Aranburu

Zordun handiek 1.170 milioi euro zor dizkiete ogasunei, iazkoaren pare. Handienak porrot egindako enpresak dira, eta ez dute ordaintzen

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.