Ezustekorik ez da izan Hegoaldeko hiriburuetako alkateen aukeraketan

Maiatzaren 27ko hauteskundeen ondoren, gaur ari dira udalak eratzen Hego Euskal Herrian. Donostia izan da hiriburu guztien artean goiztiarrena, eta goizeko hamarretarako jada aukeratua zuten Odon Elorza PSE-EEko hautagaia alkate. PSE-EEko hautetsien botoak ez ezik, EB-Aralar koalizioko hiruenak ere jaso ditu Elorzak, atzo gobernu akordioa iritsi ondoren. Horrenbestez, gehiengo osoa eskuratu du, aurreko legegintzaldian gutxiengoan gobernatu ondoren.

Gasteizen, berriz, goizeko hamarretan hasi da udala eratzeko saioa, eta aurreikusita zegoen bezala, Patxi Lazkoz PSE-EEko zerrendaburua aukeratu dute alkate eta PPko Alfonso Alonso agintetik kendu. PSE-EEko hautestsien babesa baino ez du jaso Lazkozek, eta, beraz, ez du gehiengo osorik. Oposizioko zinegotzi guztiek txuri bozkatu dute.

Bilbon eta Iruñean, berriz, ezusteko handirik gertatu ezean, Iñaki Azkuna (EAJ) eta Yolanda Barcina (UPN) aukeratuko dituzte alkate hurrenez hurren. Azkunak EB-Aralarren babesa jasoko du. Barcinak, aldiz, UPNko hautetsienak, eta, beraz gehiengo osorik gabe geratuko da.

Istiluak hainbat lekutan

Udal eraketa asko protesta artean gertatu dira, EAE-ANVren jarraitzaileak batu baitira herri askotako udaletxe atarietan Espainiako auzitegiek beren zerrendak baliogabetu dituztela salatzeko. Andoainen (Gipuzkoa), adibidez, istiluak izan da Jose Antonio Gabarain alkatea (PSE) pertsona horiek udalbatza aretotik atera ditzatela agindu ondoren. Sestaon (Bizkaia) Ertzaintzak ezker abertzaleko bi kide atxilotu ditu baliogabetzeen aurka protestan ari zirela.. Donostian ehun bat lagunek parte hartu dute protestan.