Apirilean aurreratutakoa berretsi du Nastatek. Oraingoz, inflazioak eta otsailean hasitako Ukrainako gerrak ez dute eragin handirik izan Nafarroako ekonomiaren dinamismoan. Alde batetik, lehen hiruhilekoan iazko azken hiruhilekoko erritmo berean handitu da BPGa. Bestetik, urte arteko tasari dagokionez, hazkundea %6,5ekoa da
Ekonomiak bi alde ditu, eta, eskaintzari dagokionez, industriak (+%7,4), eraikuntzak (%6,8) eta merkatu zerbitzuek (+%9,3) igoera handia izan dute iazko datuekin alderatuta —zerbitzuek, oro har, %7 egin dute gora—. Iazko lehen hiruhilekoan pandemiaren ondorioz murrizketak indarrean zeudenez, alderatze horren ondorio ere bada igoera. Hala, ostalaritzaren eta administrazio zerbitzuen jarduera igo da gehien.
Eskariaren atalean, sendien kontsumoa hiru hamarren jaitsi da iazko azken hiruhilekotik aurtengo lehen hiruhilekora; %4,4koa da hazkundea urtarriletik martxora bitartean. Inbertsioa, berriz, sei hamarren igo da, eta adieraz dezake oraingoz inflazioak, gerrak eta hornidura kateetako arazoek ez dutela enpresen inbertsio ahalmena geldotu.
Bide beretik, esportazioak %5,9 handitu dira urtebetean, urtarriletik martxora arteko epean. Batik bat industria jarduerak azaldu du dinamismorik handiena kanpo merkataritzan. Epe berean, inportazioak %2,9 handitu dira. Nastaten arabera, esportazioen eta inportazioen alde positiboa handitu da lehen hiruhilekoan.
Enplegua, berriz, %5,2 handitu da lehen hiruhilekoan, Nastaten arabera. Eraikuntza eta merkatu zerbitzuak izan dira lanpostu gehien sortu duten bi sektoreak: %6 eta %6,5, hurrenez hurren. Industrian %2 handitu da lanpostu kopurua, eta lehen sektorean, %0,2.