Albistea entzun

Katalunia

Fiskaltzak sei urteko zigorra eskatu du Kataluniako Parlamentuko presidentearentzat

ILC Letra Katalanen Instituzioko zuzendari zela lehiaketa publikorik egin gabe hemezortzi kontratu lagun bati adjudikatzea egozten diote Laura Borrasi. Espetxe zigorraz gain, 21 hilabetez inhabilitatzeko ere eskatu du Kataluniako Fiskaltzak.

Laura Borras Kataluniako Parlamentuko presidentea.
Laura Borras Kataluniako Parlamentuko presidentea. Andreu Dalmau / Foku Tamaina handiagoan ikusi

Hodei Iruretagoiena -

2022ko uztailak 14

Kataluniako Justizia Auzitegi Nagusian aurkeztutako idatzian, sei urteko kartzela zigorra eta 21 hilabeteko inhabilitazioa eskatu du Kataluniako Fiskaltzak parlamentuko presidente Laura Borrasen aurka. Prebarikazioa eta dokumentuak faltsutzea leporatzen diote; zehazki, ILC Letra Katalanen Instituzioko zuzendari zela kontratuak zatitzea, halako kontratu txikiagoak egin eta lehiaketa publikorik gabe adjudikatu ahal izateko. Borrasek 144.000 euroko isuna ordain dezala ere eskatu dute Assumpta Pujol eta Teresa Duerto fiskalek.

Denera, Fiskaltzaren akusazioaren arabera, 300.000 euroko balioa zuten hemezortzi kontratu adjudikatu zizkion Borrasek Isaias Herrero informatikariari 2013ko martxotik 2017ko otsailera artean. Pujol eta Duerto fiskalen arabera, legez kanpo eman zituen kontratu horiek Borrasek, Bartzelonako Unibertsitatean aritu zen garaitik ezagutzen zuelako.

Kataluniako Justizia Auzitegi Nagusiak joan den astean prozesatu zuen Borras, eta, Fiskaltzak azaldutakoez gain, beste bi delitu ere aipatu zituzten: iruzurra eta dirua bidegabe erabiltzea. Bi horiek baztertu egin ditu orain Fiskaltzak, eta prebarikazioa eta dokumentuak faltsutzea soilik leporatu diote.

Dimititzeko asmorik ez

Kataluniako Justizia Auzitegi Nagusiak haren aurkako auzibidea zabaldu ondoren, dimititzeko asmorik ez zuela adierazi du Borrasek azken egunetan. Orain ikusgai dago zer etorkizun izango duen, baina alderdiko kideek babesa agertu diote orain arte. Juntseko idazkari nagusi Jordi Turullek, esaterako, «babes osoa» agertu dio Borrasi, eta esan du «justizia itxura duena» dela «injustiziarik okerrena». ERCko eta CUPek kideek, aldiz, zalantza gehiago agertu dute, eta aditzera eman dute hobe lukeela pauso bat atzera ematea.

Beste bi auzipetu

Borrasi ez ezik, Herrerori ere egotzi diote prebarikazioa eta dokumentuak faltsutzea, kontratu horien onuradun izateagatik. Haren aurka ere sei urteko espetxe zigorra, 21 hilabeteko inhabilitazioa eta 72.000 euroko isuna eskatu dute. Hirugarren auzipetu baten aurkako akusazioa ere egin du Fiskaltzak, Herrerori aurrekontuak eta fakturak prestatzen laguntzeagatik.

2021eko martxoan hautatu zuten Borras Kataluniako Parlamentuko presidente, JxCk proposatuta.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Fernandez, azaroan, La Plata hirian egindako ekitaldi batean. ©DEMIAN ALDAY / EFE

Cristina Fernandezi sei urteko kartzela zigorra ezarri dio auzitegi batek

Mikel Elkoroberezibar Beloki

Ustelkeria leporatu diote, eta inhabilitazioa ezarri. Foruduna denez, Argentinako presidenteordeak babesa izango du 2023ko udaberrira arte

Errusiako armadako tanke batzuk ariketa militarrak egiten Rostov eskualdean, iazko urtarrilaren amaieran. ©EFE

Neguak gerrari eragingo dio

Igor Susaeta

Elurrak, hotzak eta eguzki orduen urriak baldintzatuko dituzte guda zelaiko mugimenduak eta horien ondorioz sortutako abaguneei eman beharreko erantzunak.
Kolonbiako eremu deforestatu bat. ©Mauricio Dueñas Castañeda, EFE

Deforestazioaren aurkako araudia adostu dute Europar Kontseiluak eta europarlamentuak

Gorka Berasategi Otamendi

Egitasmoaren helburua da baso suntsitzearekin lotutako salgaiak Europako Batasunaren merkatutik kanporatzea. Produktu jakin batzuk merkaturatzen dituzten enpresek ziurtatu beharko dute beren ekoizpen kateek ez dutela deforestazioa eragiten.

Indonesiako zigor kodearen erreformaren kontrako protesta bat, atzo, herrialdeko parlamentuaren parean, Yakartan. ©MAST IRHAM, EFE

Indonesiak urtebeteko espetxearekin zigortuko ditu ezkontzatik kanpoko sexu harremanak

Gorka Berasategi Otamendi

Parlamentuak zigor kodea moldatzea onartu du gaur. Erreformaren bidez, debekatu egin du apostasia, agintariak iraintzea eta aurrez abisurik eman gabe protesta egitea.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...