Albistea entzun

Gerra Ukrainan

Ukraina NBEren oniritziaren zain dago Itsaso Beltzetik barrena berriro zerealak esportatzeko

Kievek adierazi du hemezortzi zamaontzi bete dituztela Odesako portuan. Zelenskik uste du «datozen egunetan» hasi ahalko direla atzera laboreak itsasoz garraiatzen.

Zelenski eta Kubrakov, gaur, Chornomorsken
Zelenski eta Kubrakov, gaur, Chornomorsken EFE Tamaina handiagoan ikusi

Igor Susaeta -

2022ko uztailak 29

Ukrainako Gobernuaren arabera, etxeko lanak egin ditu. Oleksandr Kubrakov Azpiegitura ministroak zehaztu du, gaur, hemezortzi zamaontzi bete dituztela Odesako portuan (Ukraina), Itsaso Beltzetik barrena atzera zerealak esporta ditzaten. Ukrainak, Errusiak, Turkiak eta NBE Nazio Batuen Erakundeak joan den ostiralean sinatutako akordioa aintzat hartuta, espero du «astearen bukaeran» hastea lehen itsasontziak Ukrainako portuetatik ateratzen, behin «NBEren oniritzia jasota».

NBEren Giza Gaietarako idazkariorde Martin Grifiithsek adierazi zuen, atzo gauean, espero zuela lehen laboreak ostiralean hastea esportatzen, baina «ezinbesteko detaile batzuk» konpondu zain zeudela, ontzien nabigazioa segurua izate aldera. Nabarmendu zuen, bide batez, operazioa komertziala zela, ez humanitarioa, baina espero zuela herrialde txiroenek lehentasuna izatea; adibide gisa, Somalia aipatu zuen.

Itunaren arabera, aurrez zehaztutako bide jakin batetik nabigatu beharko dute ontziek, Ukrainak eta Errusiak minak jarri dituztelako Itsaso Beltzean. Hulusi Akar Turkiako Defentsa ministroak azaldu zuen, asteartean, oraingoz ez dutela minarik kenduko. Horrekin guztiarekin lotuta, eta itunean jaso dutenez, Ukrainako portuetan laboreekin egindako zamatzea Turkiako, Ukrainako eta NBEko funtzionarioz osatutako talde batek kontrolatuko du.

Odesatik, Pivdennyitik eta Chornomorsketik aterako dituzte ontziek laboreak. Hiru portuak elkarrengandik nahiko gertu daude, Odesaren bueltan, eta Volodimir Zelenski Ukrainako presidentea Chornomorskeko portuan izan da gaur, Kubrakov Azpiegitura ministroarekin batera. Zelenskik adierazi du «datozen egunetan» has daitezkeela laboreak itsasoz garraiatzen. «Gure bazkideen [NBE eta Turkia] seinaleen zain gaude hasteko».

Otsailaren 24an Errusiak Ukrainako inbasioa hasi zuenetik, hango portuetan 22 milioi tona zereal daude pilatuta —artoa, garia eta beste—, merkaturatuak izan zain. Ukrinform albiste agentziak Ukrainako iturri ofizialak aipatuz argitaratu duenez, 40.000 tona arto zamatu dituen Bulgariako ontzi bat izango da zerealen korridorea deitutakoa nabigatuko duen lehena. Inbasioa hasi aurretik heldu zen Chornomorskera, otsailaren 21ean.

Laboreak ez merkaturatzeak, azken hilabeteetan Errusiak horien esportazioari ezarritako blokeoak, munduko elikagai krisia handitu du, eta bai horregatik, bai Mendebaldeak Kremlini jarritako zigor ekonomikoengatik, inflazioak gora egin du, energiaren eta elikagaien prezioak bezala. Antonio Guterres NBEren idazkari nagusiak blokeoa kentzeko ituna sinatu eta gero adierazi zuenez, adostutakoa «munduarentzako aringarri bat» izango da.

Gerra frontean, bestalde, Mikolaiveko alkate Oleksandr Sienkevitxek salatu du Errusiako armadak barreiatzeko bonbak jaurti zituela atzo hiriko geltoki batean, eta bost hildako eta zazpi zauritu eragin zituela.

Blinkenen eta Lavroven bilera

Errusiak baieztatu du jaso duela eskaera bat Sergei Lavrov Atzerri ministroak eta Anthony Blinken AEBetako Estatu idazkariak elkarrekin telefonoz hitz egin dezaten. Gaur, Lavrovek berak adierazi du «laster» data bat proposatuko duela horretarako. Blinkenek jakinarazi zuen herenegun «funtsezko proposamen bat» egin ziola Errusiari, presoak truka ditzaten: hau da, Errusian kartzelatuta dauden bi estatubatuar, AEBetan espetxeratuta dagoen errusiar baten truke. Errusiak inbasioa hasi zuenetik ez dute elkarrekin hitz egin Blinkenek eta Lavrovek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

<b>Erantzuna.</b> Lore eskaintza, Bartzelonako Rambletan, 2017an. ©Q.G. / EFE

Erasoen osteko galdera gordinak

Gorka Berasategi Otamendi

Bartzelonako eta Cambrilseko atentatuek ezin ulertua eragin zuten, egileak gizartean «integratuta» zeuden gazte batzuk zirelako. 16 hildako eta 140 zauritu utzi zituzten.
«Eskoletan egiten ari dena ez da prebentzioa, antiterrorismoa da»

Ikatza baliatzen duen argindar fabrika bat, iaz, Dattelnen, Alemanian. ©FRIEDEMANN VOGEL / EFE

Karbono isuriak pandemia aurreko mailara heldu dira ia Europan

Arantxa Elizegi Egilegor

Aurtengo lehen lauhilekoan %6 handitu dira CO2 isurketak, iazko epe berarekin alderatuta. Bakarrik Finlandiak eta Norvegiak lortu dute isurketak murriztea. Bulgarian izan da igoera handiena: %38koa

 ©BERRIA

«Eskoletan egiten ari dena ez da prebentzioa, antiterrorismoa da»

Gorka Berasategi Otamendi

Erradikalizazio prozesua askotariko faktoreen uztartze bat da, Vidalen iritziz. Ohartarazi du nazioarteko politikek ere zuzeneko eragina dutela indarkeria jihadistaren indartzean.
Lula aurretik dela hasi dute Brasilgo bozetarako kanpaina

Lula aurretik dela hasi dute Brasilgo bozetarako kanpaina

Lide Iraola

Inkesten arabera, botoen %44 eskuratuko lituzke Langileen Alderdiko hautagaiak. Urrian egingo dituzte presidentetzarako hauteskundeak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...