Gasteizko Udaltzaingoak bi gizon atxilotu ditu gaur goizeko ordu txikietan, bikotekidea jipoitzea egotzita. Lehena 01:11n izan da; 42 urteko gizon batek bikotekidea jo du Zaramaga auzoko etxebizitza batean, eta udaltzainek atxilo eraman dute.
Handik gutxira izan da bigarrena, 02:00etan. 39 urteko gizon batek bikotekidea jipoitu du Errota Zaharra auzoko etxe batean, eta ihes egin du. Hala ere, handik gutxira erasotzaileak berak deitu du Udaltzaingora, bere bertsioa emateko, eta patruila batek atxilotu du.
Atzo hasi ziren Gasteizko jaiak, eta lehen gauean hiru emakumek salatu dute zizt egin dietela.