Hezkuntza
Hasi dira ikasgeletara itzultzen Nafarroako 100.000 ikasle
Nafarroako lau ikasletik batek ikasiko du D edo B ereduan. Ikasleen %66 sare publikoan matrikulatu dira.
Irailaren 1ean egin zuten eskola sartzea Ipar Euskal Herrian, eta Nafarroako ikasleen txanda da orain: atzo ireki zituzten 225 ikastetxeetatik hamahiru, eta gaur eta bihar artean zabalduko dituzte gainerakoak. Orotara, 106.769 ikasle matrikulatu dira Nafarroako ikastetxeetan. Araban, Bizkaian eta Gipuzkoan, berriz, itunpeko sarekoak asteon hasi dira itzultzen, eta bihartik aurrera zabalduko dituzte eskola publikoak.
COVID-19aren aurkako neurririk gabeko ikasturtea izango da 2022-2023koa: besteak beste, maskararik ez dute izango ikastetxeetan, eta burbuila talderik ere ez da egongo. Gainera, Nafarroako Gobernuak jakinarazi duenez, 3-6 urteko haurrek ez dute maskararik erabili beharko eskola garraioan. Eta eskoletan ohiko ordutegia izango dute: ikastetxeen %69k goizez bakarrik emango dituzte eskolak, eta %29k, goizez eta arratsaldez.
Nafarroako Gobernuak itzuleraren inguruko bestelako hainbat datu ere eman ditu. Hizkuntzari dagokionez, %24,7k D ereduan —osorik euskaraz, gaztelerako irakasgaiarekin— eta B ereduan —erdia euskaraz eta erdia gazteleraz— ikasiko dute. Gainera, hainbesteko zeresana eman duen PAI Ingelesez Ikasteko Programan ikasi beharko dute ikasleen %35ek. Eskolara joaten aurten hasiko direnen artean, euskarak presentzia handiagoa izango du: 3 urteko haurren %28,7 D edo B ereduan matrikulatu dituzte.
Sareen araberako datuak ere argitaratu dituzte. Azaldu dutenez, sare publikoa da nagusi: Nafarroako ikasleen %66 eskola publikoetan matrikulatuta daude.
Geroz eta ikasle gutxiago
Jaiotze tasaren jaitsiera nabaritzen ari da Nafarroako ikastetxeetan ere. HH Haur Hezkuntzan eta LH Lehen Hezkuntzan ikusten da jaitsiera oraingoz: iaz baino %4,6 ikasle gutxiago egongo dira HHn, eta %1,4 gutxiago LHn.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
