Nastatek berretsi egin ditu uztailaren amaieran aurreratutako datuak. Horien arabera, Nafarroako barne produktu gordina %0,7 handitu zen aurtengo lehen hiruhilekotik bigarrenera, eta %4,5 urte arteko tasan. Aurreko bi hiruhilekoekin alderatuz gero, moteltzea nabarmena da, 2021ko azkenekoan eta 2022ko lehenengoan %1 handitu baitzen BPG barne produktu gordina; moteltzea are nabariagoa da urte arteko tasan: bi puntukoa.
Halako moteltzerik ez du neurtu Eustatek Araban, Bizkaian eta Gipuzkoan: hiru lurralde horietako ekonomia %1,1 handitu zen apirilaren hasieratik ekainaren amaiera arte, eta %5 urte arteko tasan.
Beste lurraldeetan bezala, Nafarroan ere industria indarra galtzen ari da hazkundearen motor gisa, zerbitzuen mesedetan. Urte arteko tasak eman ditu Nastatek, eta horietan ikusten da Nafarroako industriaren hazkundea %7,4tik %2,1era murriztu dela azken hiruhilekoan; zerbitzuena, berriz, %7tik %6,2ra. Eraikuntza %5,4 hazi zen, eta nekazaritza, berriz, %1,6.
Zerbitzuen hazkundea lotuta dago kontsumo pribatuaren bilakaera onarekin: %4,2 hazi zen, administrazioek egindakoaren oso gainetik (+%0,5). Are sendoago dago enpresen inbertsioa, %5,1eko hazkundearekin.
Aberastasunaren banaketa
Ekonomiak sortutako aberastasunaren banaketari buruzko beste datu interesgarri bat ematen du Nastatek: soldatapekoen diru sarrerak %5,9 handitu dira, baina are gehiago (+%14,5) esplotazioaren soberakin gordina, hau da, enpresen eta autonomoen irabaziak. Are gehiago, soldatapekoen batez besteko soldatak %2,3 handitu ziren bigarren hiruhilekoan, inflazioaren oso azpitik (%10,2 Nafarroan, ekainean).
Enpleguak datu onak eman ditu —%4 handitu da urte arteko tasan—, batez ere zerbitzuetan (+%6) eta eraikuntzan (+%3,1).