Albistea entzun

Gerra Ukrainan

Putin bihar da sinatzekoa Ukrainan okupatutako eremuen anexioa

Kremlinek jakinarazi du Zaporizhia, Kherson, Donetsk eta Luhansk Errusiaren Federazioko kide bihurtzeko hitzarmenak sinatzekoa dela.

Vladimir Putin, aste honetan egindako agerraldi batean.
Vladimir Putin, aste honetan egindako agerraldi batean. EFE Tamaina handiagoan ikusi

Igor Susaeta -

2022ko irailak 29

Vladimir Putin Errusiako presidentea bihar da sinatzekoa Moskuk Ukrainan partzialki okupatutako eremuak anexionatzeko hitzarmenak. Hori jakinarazi du gaur Dmitri Peskov Kremlineko bozeramaileak, egunero egiten duen prentsa agerraldian. Joan den ostiraletik asteartera egindako galdeketen ondoren, anexioa formalki gauzatzeko eskatu zioten atzo Putini Kherson, Zaporizhia, Donetsk eta Luhanskeko lider errusiazaleek. Atzo gauean heldu ziren Moskura, eta Errusiako presidentearekin biltzekoak ziren. Peskovek iragarri du ekitaldia Kremlineko San Jurgi aretoan izango dela, 15:00etan —14:00ak Euskal Herrian—, eta Putinek diskurtso bat emango duela.

Horiek horrela, Volodimir Zelenski Ukrainako presidenteak ohar batean ohartarazi du «gogor» erantzungo dutela Errusiak anexioak gauzatzen baldin baditu. «Ukrainaren lurralde batasuna berrezarriko dugu». Zelenskiren aholkulari Serhiy Nikiforovek jakinarazi du Segurtasun Nazionaleko eta Defentsako Kontseilua deitu dutela biharko.

Ikusi gehiago: Errusiarekin bat egitearen alde bozkatu dute Ukrainan okupatutako lurraldeetan

Donetskeko bozkatzaileen %99k Errusiarekin bat egitearen alde bozkatu zuten; Luhansken, %98k; Zaporizhian, %93k; eta Khersonen, %87k. Parte hartzea %97koa eta %98koa izan da Donetsken eta Luhansken. Ez dute jakinarazi zenbatekoa izan den beste bi eskualdeetan. Mendebaldeak, ordea, ez die zilegitasunik ematen galdeketa horiei, iritzita nazioarteko zuzenbidea urratzen dutela. Kieventzat, Moskuren «propaganda» ekintza bat izan dira, «fartsa bat». Gainera, Errusiaren aliatu batzuek ere jakinarazi dute ez dituztela anexioak onartutako —kasurako, Kazakhstanek eta Serbiak—, eta Recep Tayyip Erdogan Turkiako presidenteak ere kritikatu ditu.

Ikusi gehiago: Kazakhstanek eta Serbiak esan dute ez dituztela aitortuko Ukrainan okupatutako lurretako galdeketen emaitzak

Errusiako Parlamentuko bi ganberak datorren astean dira anexioak gauzatzekoak. Aurrena behe ganberaren txanda izango da, eta ondoren, Senatuarena.

Alerta egoera Astrakhanen

Finlandiako Gobernuak jakinarazi du turista bisa duten errusiarrei herrialdean sartzea debekatuko dietela gauerditik aurrera. Pekka Haavisto Atzerri ministroaren iragarpen hori heldu da, hain zuzen, Putinek joan den irailaren 21ean mobilizaziorako deia egin eta gero nabarmen handitu den honetan herrialdetik alde egin nahi duten errusiarren kopurua. Haavistoren arabera, espero dute neurri horrekin nabarmen murriztea mugako trafikoa, eta iragarpen berri bat egin arte egongo da indarrean. Murrizketak ez die eragingo, ordea, «arrazoi bereziengatik» Finlandiara doazen errusiarrei.

1.340 kilometro ditu Finlandia eta Errusia arteko mugak, eta, gaur hartutako erabakiarekin, Errusiarekin muga dutenen artean turista errusiarrei herrialdean sartzea debekatuko dien EB Europako Batasuneko azken estatua bihurtu da Finlandia. Aurrez erabaki bera hartu zuten Estoniak, Letoniak, Lituaniak eta Poloniak. Finlandiako mugazainek emandako datuen arabera, 55.362 errusiar sartu dira herrialdean irailaren 21etik; hau da, aurreko egunetan baino %86 gehiago, 29.703 izan baitziren.

Horrekin guztiarekin lotuta, Errusiako Astrakhan oblastak erabaki du alerta egoera ezartzea Kazakhstanekin muga egiten duen eremuan. Horrela, trafikoa murriztu ahal izango dute, esaterako. Ipar Osetiak ere neurri bera hartu zuen, atzo, Georgiarekin muga egiten duten departamentuetan. Kazakhstanera eta Georgiara iritsitako errusiarrak nabarmen areagotu dira azken egunetan.

Nord Stream gasbideko isuriak, ikertzeko

Peskov Kremlineko bozeramaileak eskatu du gaur nazioarteko talde batek iker ditzala Nord Stream 1 eta 2 gasbideetan asteon izandako isuriak. Nabarmendu du, gainera, gasbideen haustura «ekintza terrorista bat» bat izan dela.

Ikusi gehiago: Berlinek eta Moskuk «sabotajetzat» jo dituzte Nord Streameko isuriak

Bestalde, Hungariako Gobernuak jakinarazi du ez duela babestuko Europako Batzordeak Errusiari jarri nahi dion zigor sorta berria. Joan den otsailean inbasioa hasi zenetik Bruselak Moskuri jarritako zortzigarren zigor sorta da.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Karakalpakstango 22 ekintzaileren kontrako epaiketaren hasiera, joan den astelehenean, Uzbekistango Bukhara hirian. ©BERRIA

Karakalpakstango protesten epaiketa hasi du Uzbekistanek

Gorka Berasategi Otamendi

Hogei urte arteko zigorrak eskatu dituzte 22 auzipetuen kontra. Manifestariek salatu zuten presidenteak eskualde autonomoaren subiranotasuna ezabatu nahi zuela konstituzio erreforma batekin

Macron eta Putin prentsaren aurrean, joan den otsailaren 7an Moskun egindako bileraren ondoren. ©EFE

Macronek eskatu du Errusiaren segurtasun bermeak aintzat hartzeko

Igor Susaeta

Frantziako presidenteak elkarrizketa batean adierazi duenez, Putinek gerraren amaiera negoziatzea onartzen baldin badu, aintzat hartu behar da NATO «bere ateetaraino heltzeko duen beldurra»
Turkiaren erasoaren aurkako manifestazio bat, azaroaren 20an, Qamixlin. ©EFE

SDFk jakinarazi du eten egin dituela AEBekin egiten ari ziren operazioak

Igor Susaeta

Milizia kurduak indar nagusitzat dauzkan eta Pentagonoaren babesa duen koalizioak ohartarazia zuen Ankarak eraso bat hasiz gero horri erantzutea lehenetsiko zuela. EIren aurkako borrokari eragingo dio

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...