Albistea entzun
Emakumeen aurkako indarkeriari ez
Emakumeen aurkako indarkeriari ez

Abortatzeko eskubidea

Askabide klinikatik ehun metrora ezin izango da protestarik egin, epaile batek agindu duenez

Abortatzera doazen emakumeei jazartzen dietenen aurkako kautelazko neurriak hartu ditu Donostiako lehen instrukzio epaitegiak. Gasteizen elkarretaratzea egin du mugimendu feministak, eta Ertzaintzak lau kide identifikatu ditu.

Emakumeei jazartzen ari zitzaizkienen aurka protesta egin du gaur Gasteizko mugimendu feministak.
Emakumeei jazartzen ari zitzaizkienen aurka protesta egin du gaur Gasteizko mugimendu feministak. Jaizki Fontaneda / Foku Tamaina handiagoan ikusi

Edurne Begiristain -

2022ko urriak 7

Gutxienez, ehun metrora. Askabide klinikara abortatzera doazen emakumeei jazartzen dietenek aurrerantzean ezin izango dute osasun zentroa dagoen lekutik ehun metrora gerturatu. Donostiako epaile batek arrazoia eman dio Askabide klinikari, eta aintzat hartu du abortatzeko eskubidearen aurkako protesten harira hark jarritako salaketa. Askabidek Donostian duen klinikaren aurrean protestan aritzen diren hiru lagun identifikatu zituen Ertzaintzak aste hasieran, eta horien aurkako kautelazko neurriak hartu ditu epaile batek. Hiru lagunen aurkako salaketa aurkeztu zuen Askabideko arduradun Igor Elberdinek, eta hori aintzat hartuta hartu du erabakia epaileak.

Hilabeteak dira Askabidek Donostian eta Gasteizen dituen kliniketara abortatzera doazen emakumeei jazartzen hasi zirela. Gasteizko klinikaren kasuan, protesta horiek ugaritu egin dira azken astean: abortuaren kontrako hainbat lagun osasun zentroaren atarian elkartzen dira ia egunero arrosarioa errezatzera, Ez zaude bakarrik, zu laguntzeko gaude dioten afixak eskuetan dituztela. Askabideko arduradunek asteon erabaki dute salaketa jartzea pertsona horien aurka, eta baita Donostiako klinikaren atarian biltzen direnen aurka ere. Urteak dira jazarpena pairatzen dutela, baina orain Espainian indarrean den legediak berariaz debekatzen du halako protestak egitea, eta Askabidekoek helduleku hori baliatu nahi izan dute protesta horiek amaitzeko.

Joan den apirilaren 14an indarrean sartu zen Hego Euskal Herrian haurdunaldia eteten duten kliniken aurrean abortuaren aurkako protestak egitea debekatzen duen legea. Haren bidez, abortatzeko erietxe batera joaten diren emakumeei jazartzen aritzen direnak zigortu nahi dira. Hartarako, Espainiako zigor kodea aldatu dute, eta abortuaren kontrako protestak egiten dituztenei zigorra ezarri: hiru hilabetetik urtebeterako presondegi kondena, hain zuzen. Zentro horietako langileei eraso egitea ere debekatzen du arauak. Gainera, salaketa prozesua ez du nahitaez abiatu beharko erasoa jasan duen emakumeak, automatikoa da.

Legea indarrean egonda ere, Poliziak ez ditu eragotzi abortuaren aurkako protestak. Azken egunotan Askabideko langileek askotan eskatu diete poliziei jazartzen ari zirenak identifikatzeko, baina ertzainek entzungor egin diete eskaerei. Aste honen hasieran, ordea, protestan ziren batzuk identifikatu zituzten, eta horien aurkako salaketak aurkeztu zituen Askabidek. 40 dias por la vida abortuaren aurkako elkarteko kideak dira salatutakoak.

Epaileak gaur ebatzi duenez, Askabidera abortatzera doazen emakumeen intimitatea eta abortatzeko eskubidea urratzen dute protesta egiten dutenek. Halaber, klinikako langileen eskubideak urratzea egotzi die.

Feministen erantzuna

Azken egunotan Gasteizko klinikaren inguruan izandako tentsioak mugimendu feministaren erantzuna eragin du. Gure gorputza, gure erabakia. Kanpora errosarioak gure obarioetatik lelopean, elkarretaratzea egin dute gaur arratsaldean abortatzeko eskubidearen aurka ari zirenen aurrean. Salatu dute «nazioartean antolatutako erakundeak» daudela halako «ekintza intimidatzaileen» atzean: «Emakumeon eta sexu-genero disidenteon gorputzen gaineko kontrol heteropatriarkalaren adierazleak dira».

Erakunde publikoen jarrera ere kritikatu dute, «oinarrizko eskubide izan beharko lukeena ez kudeatzeagatik», eta propio gaitzetsi zuten Poliziaren jarduna: «Egoeraren arabera jokatzen du: antolakuntza feminista kriminalizatzen du, eta emakumeon menderatzea babesten». Izatez, gaurko elkarretaratzean lau feminista identifikatu ditu Ertzaintzak: «Aldiz, abortuaren aurkakoak ez dituzte identifikatu, eta hor daude oraindik».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Alemaniako Grevenbroich hiriko parke eolikoa, eta, atzean, ikatzezko zentrala, duela gutxiko irudi batean. ©SASCHA STEINBACH / EFE

PLANETAREN MUGEKIN TALKAN

Iñaki Petxarroman

50 urte dira Hazkundearen Mugak txostena kaleratu zutela. Ekonomia ulertzeko beste modu bat ezarri zuen, eta zientzian oinarritutako sistema batekin erakutsi zuen hazkunde etengabeak etorkizunean eragin zitzakeen arazoak. Gaur egun, begi bistan daude arazo horietako batzuk, hala nola klima krisia eta bioaniztasunaren galera.
 ©BERRIA

«Gure aztarna ekologikoak egungoaren hamarren bat izan behar du»

Iñaki Petxarroman

Kontsumoa eta ekoizpena apaltzea eta espiraleko ekonomia martxan jartzea beste biderik ez du ikusten Antonio Valerok.
Juan Mari Aburto lore eskaintza egiten, atzo, Bilbon. ©BILBOKO UDALA

Frankismoak espetxeratutako andreak omendu dituzte Bilbon

Iosu Alberdi

Bilboko Udalak eta Gogora institutuak plaka bat jarri dute Orue Txaleta zegoen lekuan. Eraikin hura espetxe izan zen 1937tik 1942ra bitarte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.