Jon Rodriguez blogariak amaitu du Europako zeharkaldia ere

Orain bai. Jon Rodriguez Biziz blogeko bidaiariak amaitu du Hego Afrikan duela urte eta erdi hasi zuen zeharkaldia. Hasieran Asiaraino joatekoak ziren bera eta Pello Alberdi bidaiakidea, baina, Egiptora iritsita, etxerako bidea hartzea erabaki zuten: Alberdik hegazkinez zeharkaldia amaituta, eta Rodriguezek bizikletan, zeharkaldiarekin jarraituz. Azaroaren amaieran iritsi zen etxera, eta urte berriarekin egin du blogeko azken sarrera: 'Ametsetako amaiera'. Bordelen (Okzitania) hasi eta Ordizian (Gipuzkoa) amaitzen da azken etapa hori, eta Baionara heltzean sentitu du iritsi dela etxera: «Baionara gerturatzearekin batera, hara non agertu den Ene Amets baserria. Euskarazko lehen hitzekin elkartu naiz etxean naizela sentitzeko, ene ametseko bidaia amaitzear dago».

«Oihartzuna eman nahi diogu zenbait GKEk egiten duten lanari». 2021eko irailaren 15ean hasi zuten bidaia Rodriguezek eta Alberdik, eta, pedalkadaz pedalkada, BERRIAren Biziz blogean kontatu dituzte euren ibilerak orain arte. Hegoafrikara joan ziren lehenik, hegazkinez. Handik, iparralderantz joan ziren: Hegoafrikatik Zimbabwera, Zimbabwetik Zambiara, eta Zambiatik Tanzaniara. Han, bidaia birplanteatu behar izan zuten: Tanzaniara iritsi eta gero, Kenyara joan behar zuten, baina azkenean gorantz jarraitu dute, «Afrika guztiz gurutzatzeko». Hala kontatu zioten iazko martxoan BerriaTBri:

Iazko uztailean bukatu zuten Afrikako bidaia, eta, Kairotik Atenaserako bidaia hegazkinez egin ondoren, Rodriguez hasi zen pedalkadak ematen Europan: «Iritsi da eguna, etapa berri bat. Azken besarkadaz elkar estutu eta zorte ona opa ostean, bakoitzak bere bideari ekin dio. Zazpi hilabetez une oro alboan izan dudan Pelloren hutsunea sentitzea saihetsezina izango da, bizipen eta anekdotak berarekin ez partekatzea faltan botako dut, ez dut zalantzarik. Hala ere, motibazioz gainezka heltzen diot fase berri honi. Ez dut plangintza espezifikorik, ezta nahi ere. Sentsazioak izango dira bidaiaren gidari, ea nora eramaten nauten! Seguruenik Ordizian bukatuko dut, etxean, baina… hala izango al da? Nork daki!».

Ordizian amaitu zuen, bai, eta nola, gainera. Azken kilometroetan, lagunak eta Pello Alberdi izan zituen lagun. Donostia, Tolosa, Itsasondo... hurbildu ahala emozioa areagotu egiten zela azaltdu du blogean. Ordiziara heltzean, sekulako ongietorria egin zioten. Han zituen zain familia, lagunak, ikastolako eta unibertsitateko ikaskideak, eta futboleko taldekideak eta herriko lagunak. «Ametsik onenean ere ez nuen horrelako harrerarik espero. Jende onez inguratua nago, eta maitatua sentitzen naiz. Ez dago gehiago eskatzerik. Zoriontsu naiz».