Bi aste barru, hilaren 27an abiatuko da Arabako Bertso Kuadrillen Artekoa. Zazpigarren urtez egingo dute aurten, eta txapelketa formatua izango du aurtengoak ere. Maeztun izango da lehenengo saioa, eta Laudion azkenekoa, martxoaren 25ean. Guztira, 280 parte hartzaile baino gehiago ariko dira, bertsolariak, gai jartzaileak, epaileak eta gainerako eginbeharrez arduratuko direnak kontuan hartuta.
2010ean antolatu zuten txapelketa lehen aldiz, eta orduz geroztik bi urtean behin antolatu dute. Mugarri bat ezarri zuen lehiak orduan Arabako bertsolaritzan, eta bide orri eutsi nahi dio aurtengoak ere: urteetan eraikitako mugimendua saretzea eta indartzea izango du helburu, hain zuzen ere. Hala adierazi dute Arabako Bertsozale Elkarteko eta taldeetako ordezkariek txapelketaren aurkezpenean.
Bi modalitate
Txapelketak bi modalitate izango ditu aurten ere: bat-bateko eta idatzizkoa. Aurrenekoan, hamabi talde ariko dira lehian, eta hamasei ariko dira bigarrengoan. Bedertzi-hamabi laguneko taldeak izango dira, eta horietatik hiru edo sei ariko dira kantuan; gainerakoak beste zeregin batzuetaz arduratuko dira. Izan ere, taldeak bertso saioak antolatzeaz ere arduratu beharko dira.
Guztira, beraz, bat-batekoan 64 lagun ariko dira kantuan, hamasei epaile lanetan, hamasei gai-jartzaile gisa, eta gainerakoak bestelako lanetan. Aiaraldeak, Arabako Errioxak, Mendialdeak, Lautadak (bi talde), Gorbeialdeak (lau talde) eta Gasteizek (hiru talde) izango dute ordezkaritza bat-batekoan.
Idatzizkoan, aldiz, hamasei taldek parte hartuko dute. Bertsoak prestatu, idatzi eta jende aurrean kantatuko dituzte. Ez da lehiarik izango, ordea. Arabako zortzi kuadrillek izango dute ordezkaritza modalitate honetan, eta bat-batekoen saioak egiten direnean kantatuko dute.
Martxoaren 25era bitarte, hamabost saio izango dira: hamabi kanporaketa eta hiru finalaurreko. Hauek dira datak:
Kanporaketak
Urtarrilak 27: Gasteiz (bi saio) eta Oion
Urtarrilak 29: Laudio
Otsailak 3: Gasteiz
Otsailak 4: Aramaio eta Agurain
Otsailak 5: Narbaxa (Donemiliaga)
Otsaila 10: Aramaio (bi saio)
Otsailak 11: Murgia eta Korres (Arraia-Maeztu)
Finalaurrekoak
1.Finalaurrekoa. Otsailak 26, Aguraingo Zabalarten
2.Finalaurrekoa: Martxoak 4, Bastidako Kultur Etxean
3.Finalaurrekoa: Martxoak 12, Zuiako udaletxean
Finala
Martxoak 25, larunbata, Laudio
