Albistea entzun

Mendebaldeko Sahara

Fronte Polisarioak Marokoren kontrako «borroka armatua areagotzea» onartu du

Buruzagia aukeratzeko, Mendebaldeko Saharako askapen mugimendu nazionalak bihar arte luzatu du su etena hautsi osteko lehen kongresua.

Fronte Polisarioaren kongresua
Fronte Polisarioaren kongresua STR/ EFE Tamaina handiagoan ikusi

Isabel Jaurena -

2023ko urtarrilak 20

Fronte Polisarioa XVI. Kongresua egiten ari da joan den ostiraletik, eta atzo baiezkoa eman zioten askapen mugimendu nazionalaren buruzagitzak proposaturikoari: Marokoren kontrako «borroka armatua areagotzea». Saharako mugimendu independentistaren estrategia berriaren barruan hartu zuten erabakia.

Ikusi gehiago: Polisarioak su etena hautsi osteko lehen kongresua abiatuko du gaur, Dakhlan

«Borroka armatua ardatz nagusi duen ekintza plan nazionala onartzeak berretsi egiten du saharar herriak eta haren ordezkari legitimoak, Fronte Polisarioak, borroka armatuaren alde egin duten apustua, beren eskubideak defendatzeko eta beren eskubideen gaineko subiranotasuna berreskuratzeko tresna gisa», adierazi zuen Mohamed Sidati kongresuko bozeramaileak.

Estrategia berrian, bide diplomatikoak eta «okupatutako lurraldeen» egoera «indartu» nahi dituzte, baita komunikazioa ere. Alor horretan, Espainiako Gobernuaren jarrera aldaketa esanguratsua izan da, Pedro Sanchez gobernuburuak iaz jakinarazi baitzuen Rabaten Mendebaldeko Sahararentzako autonomia plana sostengatzen dutela, gatazka gainditzeko aukerarik «serioena, errealistena eta sinesgarriena» dela argudiatuta.

Buruzagitzari buruzko bozketa ere egin behar dute, eta, horretarako, bihar arte kongresua luzatzea erabaki dute. Gaur eginen dute bozketa, eta bi hautagai aurkeztu dira: Brahim Gali egungo idazkari nagusia —irabaziz gero, hirugarren agintaldia izango luke—, eta Batxir Mustafa, El-Uali Mustafa Saied lider historikoaren anaia —babes handiena jasoz gero, lehen aldiz hartuko luke buruzagi kargua—. Emaitzak gaurko espero dira.

Fronte Polisarioa eta Maroko higatze gerra batean ari dira 1991n adostutako su etena hautsi zenetik; Maroko Guerguerat eremuan sartu izanak eragin zuen ia hiru hamarkadako menia haustea eta gerra egoerara itzultzea. Marokok 1975ean okupatu zuen Mendebaldeko Sahara, eta Polisarioa gerran aritu zen, harik eta, erreferendum baten promesaren truke, menia sinatu zuen arte.

Ikusi gehiago: Fronte Polisarioak hautsitzat jo du 1991ko su etena, eta gerra egoera ezarri du

Rabaten eta Fronte Polisarioaren arteko azken elkarrizketa ofizialak 2008an egin zituzten, New Yorken (AEB), eta Staffan de Mistura Mendebaldeko Sahararako NBEko ordezkari izendatu zutenetik, 2021eko azaroan, bide diplomatikoak ez du aurrerapausorik eman.

Aurten, gainera, Mendebaldeko Saharako askapen mugimendu nazionalak 50 urte beteko ditu, maiatzaren 10ean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©EMILIA GUTIERREZ / LV

«Ezohiko egoera bat sortu dugu: epaileek iritzia ematen dute guztiaren inguruan»

Mikel Elkoroberezibar Beloki

Espainiako botere judizialak joera erreakzionarioa hartu duela uste du Pedro Vallinek, eta hori ez dela kasualitatea. Azaldu du Espainiako Estatuak bere iraupena arriskuan ikusten badu demokrazia «etsaitzat» eta «mehatxutzat» har dezakeela.
Jerusalemgo atzoko erasoan zauritutako bat, esku ohe batean. ©A. SAFADI / EFE

Bi israeldar larri Jerusalemen izandako beste eraso batean

Berria

Erasotzailea 13 urteko nerabe palestinar bat da, Israelgo Poliziaren arabera. 42 lagun atxilotu dituzte Zisjordanian
Poliziaren indarkeriaren kontrako manifestazio bat, atzo, Atlantan, Georgia estatuko hiriburuan. ©ERIK S. LESSER / EFE

Poliziak Nicholsi eman zion jipoiak protestak piztu ditu AEBetan

Gorka Berasategi Otamendi

Ostiralean publiko egin zituzten bost poliziak gazte afro-amerikarrari eman zioten jipoiaren irudiak. Grabazioetan ikusten denez, bortizki jo zuten, baita aurre egiteko aukerarik ez zuenean ere
Greziatik kanporatutako migratzaile talde bat, baltsa batean, Turkiako kostazainen esku gelditzear. ©ERDEM SAHIN / EFE

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.