Ukrainari EB Europako Batasunean sartzeko hautagai estatusa eman zioten talde komunitarioko kideek joan den ekainean, eta Ukrainako lehen ministro Denis Xmihalek adierazi du Kieven asmoa dela bi urteko epean klubeko kide bihurtzea. «Plan oso anbiziotsu bat dugu», esan dio Politico aldizkariari. EBn sartzeko negoziazioak aurten hasteko itxaropena dauka Ukrainak, lehen ministroak adierazi duenez. Nolanahi ere, talde komunitarioak aurreikusten du denbora gehiago behar izatea prozesua gauzatzeko bidean jartzeko.
Eta, gerra frontean, Errusiak Ukrainako hiriak bonbardatzen jarraitzen du. Khersonen gutxienez hiru pertsona hil ziren atzo, eta hamar zauritu. Hango agintarien arabera, bonbardaketek zenbait azpiegitura hondatu dituzte: besteak beste, ospitale bat, tren geltoki bat, eskola bat eta etxebizitza bloke batzuk. Eta Kharkiven pertsona bat zendu zen atzo, Errusiak jaurtitako misil batek etxebizitza bloke bat jota.
Errusiako Gobernuak jakinarazi du, bestalde, Zaporizhiako zentral nuklearraren inguruan segurtasun eremu bat sortzeko IAEA Energia Atomikoaren Nazioarteko Agentziarekin edukitzen ari diren negoziazioak ez direla «errazak». Errusiako Atzerri ministrorde Sergei Riabkovek esan dio RIA Novosti Errusiako berri agentziari Moskuk eremu horri buruzko proposamenak egin dizkiola NBE Nazio Batuen Erakundearen agentziari, baina Ukrainak ez duela halakorik egin.
Finlandia, bere kabuz
Recep Tayyip Erdogan Turkiako presidenteak atzo adierazi zuen Suediarekin eta Finlandiarekin biekin batera negoziatu beharrean bakarka negoziatuko duela bi herrialde horiek NATO Ipar Atlantikoko Itunaren Erakundeko kide bihurtzeaz. Izan ere, azken asteetan gaiztotu egin dira Ankararen eta Stockholmen arteko harremanak. Horiek horrela, Finlandia «berehala» jarri da berriro harremanetan Turkiarekin, Sauli Niinisto presidenteak jakinarazi duenez.
