MIGRATZAILEAK
Gutxienez hiru migratzaile hil eta hogeitik gora desagertu dira Lesbostik gertu
Kostazainek hamasei pertsona erreskatatu dituzte. Bizirik atera direnen esanetan, haien ontzia haitzen aurka jo ostean hondoratu da.
Greziako kostazainek kaleratutako oharraren arabera, 41 migratzaile zihoazen itsasontzi bat hondoratu egin da Lesbos uhartetik gertu, haitzak jo ondoren. Istripu horretan, gutxienez hiru pertsona hil dira, itota; hogei lagun baino gehiago, aldiz, desagertu egin dira. Kostazainek hamasei pertsona erreskatatu dituzte, eta horietatik hamar ospitaleratu egin dituzte, hipotermia zantzuekin. Hondoa jo duen ontzia Turkiatik irten zen.
Helikoptero bat eta kostazainen bi txalupa motordun Egeo itsasoan desagertu diren migratzaileen bilaketan ari dira. Hori bai: agintarien arabera, baldintza meteorologiko txarrak dituzte, haize bolada bortitzen eta itsaso zakarraren eraginez.
Duela bi egun, beste lau haur eta emakumezko bat itota zendu ziren Leros uhartetik gertu, haien txalupa hondoratu ondotik.
Eta joan den ostiralean, Italiako kostazainek 42 pertsona erreskatatu zituzten Lanpedusatik gertu. Zortzi lagun hilik atera zituzten ontzitik, eta, erreskatatutako migratzaileen esanetan, hotzez hil ziren. Beste bi desagertutzat jo zituzten.
IOM Nazioarteko Migrazio Erakundearen arabera, gutxienez 376 migratzaile hil ziren iaz Turkiako kostatik Lesboserako bidean: 2016tik hildako kopururik handiena.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
