«Homologazioa ez ukitu». Horixe da gaur Osakidetzako langile azpikontratatuek hasi duten grebaren aldarri nagusia. LABek, UGTk, CCOOk eta ESK-k egin dute grebarako deia, eta aste osorako mobilizazioak ere iragarri dituzte. Gaur egin dituzte Gasteizen, Barakaldon, Donostian eta Zumarragan. Biharko ere antolatuta daude: Bilbon, 11:00etan, Basurtuko ospitaleko kanpo kontsultetan egingo dute protesta; Gasteizen, 10:30ean, Araba unibertsitate ospitaleko kanpoko kontsultetan; Donostian, 10:00etan, Donostia ospitalean; Zumarragan ere, erietxean, 14:30ean. Aste osoan greba egiteko asmoa dute. LAB sindikatuak salatu du gaur Barakaldon egin duten protestan ertzainak langileei oldartu zaizkiela.
Sindikatuek ohar bat atera dute aldarriaren nondik norakoak azaltzeko. Nabarmendu dute langile taldeak bost urte daramatzala lan itunik gabe, eta enpresekin bilera ugari egin diren arren «blokeatuta» daudela negoziazioak. Argi dute langileen ordezkariek helburua: «Langile hauen lan baldintzak Osakidetzako langileenekin homologatzea». Nabarmendu dute legez enpresek, langileek eta Osakidetzak irizpide horren araberako «joko arauan» jardun behar luketela, baina bai enpresak eta baita Osakidetza bera ere «homologazio printzipioa» urratzen ari direla.
Sindikatuek argudiatu dute homologazioa lortuta nabarmen hobera egingo dutela langileen baldintzek. Langileek era izango dute «garapen profesionaleko deialdietarako» sarbidea izateko; sistema «bidezkoagoa» izango dute bete gabe dauden lanpostuak betetzeko; eskubidea izango dute «txanda kontratuari lotutako erretiro partziala» hartzeko; eta modua izango dute Osakidetzako langileek onartuak dituzten «baimen eta lizentziak» eskatzeko, besteak beste.
Enpresen jarrera
Enpresen jarrera kritikatu dute sindikatuek. «Jarrera erosoan» daudela uste dute: «Eta erantzukizuna Osakidetzako zuzendaritzari zuzendu diote». Uste dute, ordea, Osakidetzak ez duela urratsik egin egoera «desblokeatzeko»: «Bi urte daramatzagu Osakidetzaren atea jotzen, baina salatu behar dugu erakunde publiko honek ez duela erakutsi guri erantzuteko begirunerik».
Esan dute horren aurrean langileak ez direla «besoak gurutzaturik» geratuko: «Homologazioa irmo defendatuko dute». 2.500 langile inguru dira.
