In extremis, baina garaiz. Beldurra zegoen gaur, Suitzan, eta Europa osoan, burtsak zabaldu eta Credit Suisse bankua are gehiago hondoratuko ote zen. Asteburu osoan, jo eta ke aritu dira Suitzako agintariak eta hango bankuetako arduradunak konponbide bat bilatzeko, astea hasi aurretik. Igande iluntzean aurkitu zuten arnasbidea: UBS Suitzako bankuak Credit Suisse erostea adostu zuen, 3.000 milioi euroan. Suitzako Gobernuaren babesarekin egin dute operazioa.
Bizkarrekoa izango da akziodunentzat, bankua joan zen ostiralean 8.000 milioi euroan baloratuta baitzegoen, baina hondoa jotzear zegoen. Kolpearen zenbatekoa gaur goizean neurtu da, Zuricheko (Suitza) burtsaren irekieran. Credit Suisseren akzioen balioa %64 jaitsiak ziren, eta 0,67 frankotan zeuden salgai (0,68 euro) —ostiralean 1,76 frankotan zeuden (1,77 euro)—. UBSk 0,76tan (0,77 euro) erosi zituen igandean, eta hala ere jaisten jarraitu dute. USBren akzioek ere nabaritu dute erabakiaren ondorioa: -%13.
«Konponbide bat topatu dugu egonkortasuna ziurtatzeko, eta Suitzako ekonomia babesteko salbuespen egoera honetan», esan du Suitzako Banku Zentralak, ohar baten bitartez. Sistemak arnasa hartu du, banku batek bestea erreskatatuko duelako, baina Ralph Hamess USBko kontseilari delegatuak jakinarazi du doiketak egin beharko dituela Credit Suisseko lantaldean. Alegia, kaleratzeak datozela, baina ez du zehaztu zenbat. Hamesek nabarmendu du bi bankuren arteko fusioa gertatzen denean beti bilatzen direla «sinergiak». Credit Suissek egun 50.000 langile ditu.
Prentsaurrekoa eman zuen atzo Suitzako gobernuburu Alain Bersetek. Esan zuenez, ostiralean ikusi zuten Credit Suissenganako konfiantza berreskuratzerik ez zegoela, eta konponbide bakarra UBSk hura erostea zela. «Erantzukizuna» aipatu zuen Bersetek neurria hartzeko arrazoi gisa, «Credit Suisse kontrolik gabe hondoratzeak ondorioa kalkulaezinak eragingo lituzke nazioarteko finantza sisteman».
Baina zein rol izan du Suitzako Gobernuak? Hasteko, artekari eta suhiltzaile lanak egin ditu, eta ondoren kutxa ireki du USBri bermea emateko. 9.000 milioi euro emango dizkio USBri Credit Suissen arrisku poltsa batzuek eragin diezazkioketen galerak eragozteko. Halaber, Suitzako Banku Nazionalak 100.000 milioi euroko likidezia lerroa jarriko du eroslearen esku. Pozez hartu du erabakia Christine Lagarde Europako Banku Zentraleko presidenteak, eta euroguneko banku sistema «sendo» dagoela adierazi du.
Tentsioak burtsetan
Credit Suisseren krisiak Suitzako bankuetan izan du eragin handiena, baina handik kanpo, Europako beste herrialdeetan ere egun beltza izaten ari da finantza erakundeentzat. Frantzian, esaterako, Societe Generale eta BNP Paribas bankuen akzioen balioak %6,9 eta %6,4 egin du behera, hurrenez hurren. ING Herbehereetako bankua %5,66ko jaitsierarekin esnatu da, eta UniCredit eta Intesa Sanpaolo Italiakoak ere bestondo gogorra izan dute: %4,97 eta %3,31 hurrenez hurren.
Alemanian kolpea handiagoa izan da, Deutsche Bankek %10eko galera izan du egunaren hasieran eta Commerzbankek %8koa. Irekiera datuak dira horiek, orduak pasatu ahala akzioen balioa igoz joan da. Goizean, Munduko Banku Zentralik handienek elkarren arteko diru trukeak erraztuko dituztela jakinarazi dute, eta giroa lasaitu du. Burtsen itxierara itxaron beharko da egun beltz bat baino gehiago izan den jakiteko.
