Indarkeria matxista

Gizon batek urruntze agindua hautsi eta labanaz eraso die emazte ohiari eta hiru seme-alabei Eguesibarren

Alaba nagusia buruan zauritu du labanarekin. Emakumeak eta beste bi seme-alabek ihes egin ahal izan dute. Gizonak bigarren solairutik behera bota du bere burua. Mugimendu feministak asteazkenean biltzera deitu du, erasoa gaitzesteko.

Indarkeria matxistaren kontrako mobilizazioa, Iruñean, iaz azaroaren 25ean. JAGOBA MANTEROA, FOKU
jon ordonez garmendia
2023ko apirilaren 1a
07:28
Entzun

Bart gauerdian indarkeria matxistako eraso larri bat izan da Eguesibarren (Nafarroan), Erripagaina etorbidean. Gizon batek emazte ohiarengana ez hurbiltzeko agindua hautsi du, eta labana batekin sartu da emakumea hiru seme-alabekin bizi den etxean. Alaba nagusiari buruan egin dio eraso labanarekin. Emakumea eta beste bi seme-alabek ihes egin dute. Euskadi Irratiaren arabera, gizona bere buruaz beste egiten saiatu da gero, bigarren solairutik behera jauzi eginda.

Larrialdi zerbitzuak ohartarazita, Eguesibarko udaltzainak eta foruzainak joan dira emakumea eta seme-alabak bizi diren etxera. Labanaz zauritutako alaba Iruñeko ospitalera eraman dute anbulantzia batean. Gizona ere ospitale berean erietxeratu dute, eta Poliziaren zaintzapean dago. Atxilotu egingo dutela aurreratu dute zenbait iturrik. Emakumea eta bi seme-alaba txikienak lekuan bertan artatu dituzte.

Eguesibarko mugimendu feministak asteazkenean kontzentrazio batean parte hartzera deitu du, erasoa arbuiatu eta biktimei babesa erakusteko.

Ikusi gehiago: Gizon bat atxilotu dute Iruñean, emakume bat bortxatzea egotzita

Aste honetako bigarren eraso matxista larria izan da. Ostegunean, Bilbon, emakume bati jipoia eman eta su eman zioten, haren etxean. Andrea oso larri ospitaleratu zuten Gurutzetako erredura larrien unitatean. Egunean bertan emakumearen bikotekide ohia atxilotu zuten. Atzo, baina, aske utzi zuten.

Polizien arabera, ikerketan «beste hipotesi bat» zabaldu dute. Ohar bidez adierazi dutenez, atzo erasoa izan zen etxean bildutako «informazioek eta zantzuek» gizona atxilotzera eraman zituen, baina ondoren egindako ikerketekin «beste lan ildo bat» zabaldu dute.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.