Errusiako indarrek Kiev bonbardatu dute goizaldean. Ukrainako iturri ofizialen arabera, hil honetan herrialdeko hiriburuari airez egindako zortzigarren erasoa izan da, eta «ezohiko intentsitatea» eduki du. Ez da hildakorik egon, baina bonbardaketak hiru zauritu eragin ditu gutxienez. Ukrainaren esanetan, Moskuk droneak, gurutzaldi misilak eta misil balistikoak jaurti ditu itsasotik, lurretik eta airetik.
Armadak ordu batzuk geroago jakinarazi duenez, baina, aireko defentsa sistemek sei misil supersoniko, bederatzi gurutzaldi misil eta hiru misil balistiko erorarazi dituzte. Iturri horrek ez du zehaztu non suntsitu dituzten. Errusiako Atzerri Ministerioak nabarmendu du, ordea, Mendebaldeak Ukrainari emandako Patriot defentsa sistema bat suntsitu dutela misil balistikoek; hau da, batak eta besteak plazaratutako bertsioak kontrajarriak dira. Kremlinek adierazi du erasoak helburu militarrak zituela, eta bonbardaketek horiek jo dituztela.
Eraso horiek, hain zuzen, Volodimir Zelenskik Europan bira bat egin ondoren heldu dira. Ukrainako presidentea Italiako eta Erresuma Batuko lehen ministroekin, Alemaniako kantzilerrarekin eta Frantziako presidentearekin batzartu da azken egunetan, eta denek laguntza militarra agindu diote. Zelenskik gerra hegazkinak eskatu dizkie, gainera.
Ikusi gehiago: Putinek AEBei esan die Patriot misilen aurkako «antidotoa» topatuko duela
Eta gerrako fronte nagusian, Donetsk eskualdeko Bakhmut hirian, hura konkistatzeko ahaleginean «pixkanakako aurrerapausoak» ematen jarraitzen dute Errusiako indarrek, Erresuma Batuko Defentsa Ministerioak Twitterreko bere kontuan zabaldu duenez. Wagner talde paramilitarrarekin ari da Mosku han borrokan, eta horren buru Jevgeni Prigozhinek Telegramen argitaratu duen bideo batean azpimarratu du Ukrainako soldaduen erresistentzia «oso gogorra» dela. Horren harira, Erresuma Batuko zerbitzu sekretuek azaldu dute indar horiek «aurrerapauso taktikoak» eman dituztela azkeneko lau egunetan.
Ez dago argi zer balio estrategiko duen Bakhmutek, baina bi aldeak joan den uda amaieratik ari dira han borrokan. Wagnerreko mertzenarioekin ari da Mosku, eta horien buruzagitzaren eta Kremlinen arteko ika-mikak oso ohikoak dira. Prigozhinek Sergei Xoigu Defentsa ministroari egotzi dio behar adina munizio ez ematea, eta, duela bi aste, Bakhmutetik erretiratzeko mehatxua egin zion.
Ikusi gehiago: Asteazkenean Bakhmutetik ateratzeko mehatxua egin dio Wagnerrek Moskuri
Arma nuklearrez
Zenbat buru nuklear dituen jakinarazteari uko egin dio Errusiak. Atzo gauean, AEBetako Estatu Departamentuak ohar baten bidez adierazi zuen kontinente arteko 662 misil dauzkala hedatuta, eta, 1.419 buru nuklear eta 800 jaurtigailu dituela guztira. Errusiari eskatu zion, bide batez, datu horiek plazaratzeko, baina, gaur, Sergei Riabkov Atzerri ministrordeak Errusiako behe ganberan esan du ez dutela halakorik egingo. Aintzat hartu behar da Moskuk START Berria akordioa eten zuela otsailean. Errusiak eta AEBek 2010ean sinatu zuten itun hori, arma nuklearrak kontrolatzeko.
Eta gerrarekin berarekin lotuta, Cyril Ramaphosa Hegoafrikako presidenteak adierazi du Zelenski eta Vladimir Putin Errusiako presidentea prest daudela «Afrikako liderrak» hartu eta haiekin eztabaidatzeko gatazkari irtenbide bat nola eman. Singapurko lehen ministro Lee Hsie Loongekin egindako agerraldi batean eman du horren berri.
Bestalde, Ukrainako Auzitegi Goreneko presidente Vsevolod Kniazev atxilotu dute, eroskeria leporatuta. Ustelkeriaren Kontrako Fiskaltzaren buru Oleksandr Omeltxenkek eman du horren berri, prentsaren aurrean, eta gaineratu du auzitegi horretako beste epaile batzuk ere ikertzen ari direla kasu horrekin lotuta. Tokiko hedabideek Polizia iturriak aipatuta kaleratutako informazioaren arabera, Kniazevek 2,4 milioi euro inguru jaso ditu, eroskeria baliatuta.
NATOrentzako dirua
2014an, NATO Ipar Atlantikoko Itunaren Erakundeak ontzat jo zuen aliatuen gastu militarra estatu bakoitzeko BPG barne produktu gordinaren %2 izatea gutxienez. Aliatuek konpromiso hori berretsi zuten iaz, baina, Alemaniako Ifo institutuak gaur kaleratutako ohar baten arabera, blokea osatzen duten 31 herrialdeetatik 11k gastatzen dute ehuneko hori baino gehiago, eta gehienak ekialdeko kideak dira: Errusiatik eta Ukrainarik gertuen daudenak, alegia.
«Mendebaldeko herrialdeek neurriz handitu dute defentsako gastua», nabarmendu du institutuak. Alemaniak, esaterako, BPGaren %1,6 jarriko du horretarako, eta, 31 herrialdeen artean, ekarpenik handiena egiten dutenetan hamazazpigarrena izango da. Beste datu bat: AEBen ekarpena aintzat hartu gabe, NATOko kideek beren BGParen %1,8 jarriko dute defentsarako, batez beste.
Poloniak baliatuko du ehunekorik handiena 2023an: %4,3. AEBak dira bigarrena (%3,3), Grezia hirugarrena (%3,1), eta Baltikoko bi herrialde datoz jarraian: Estonia (%2,9) eta Lituania (%2,6). Finlandia kide berria da seigarrena (%2,4), eta ondoren datoz Hungaria eta Errumania (%2,3), Erresuma Batua eta Letonia (%2,2) eta Eslovakia (%2).
