Ehunka lagun bildu dira Gasteizen azpiegitura proiektu handien aurka

Landa eremuari eta natura guneei «erasotzen» dieten azpiegitura handiak arbuiatzeko eta eraikitzeari utzi diezaioten eskatzeko manifestazio jendetsua egin dute gaur, Gasteizen, Lurraren defentsan, Euskal Herria bizirik lelopean. Ehunka lagunek ozen salatu dute «makroproiektuek» ekosistemen eta landa eremuko bizimoduaren «desagertzea» ekarriko duela, eta gaitzetsi dute enpresa handiak izango direla horren «onuradun bakarrak».

Izan ere, protestaren amaieran irakurritako agiri batean salatu dute natur guneak «industrializatuko» dituzten azpiegitura berrien «erasoaldi bat» izaten ari dela. Trenbideak, zentral eoliko eta fotovoltaikoak, erraustegiak, animaliak hazteko ustiategi erraldoiak... trantsizio energetikoaren aitzakian eraikitzen ari direla azpimarratu dute, eta, bitartean, administrazioak diru publikoa patrika pribatuetara «desbideratu» duela.

Horren aurrean, «eredu ekosiziala» aldarrikatu dute, eta agintariei eskatu zieten natura «benetan» babestuko duen eta «inbertitzaileen diru goseari men egingo ez dien» politikak martxan jartzeko: «Energia eskuratzeko aukera unibertsala ekarriko duen politika nahi dugu, pertsona guztien beharrei erantzungo dien eredu energetiko deszentralizatu eta tokikoan oinarritua».
San Anton plazan hasi da protesta, eta, Frantzia zein Bake kaleak zeharkatu ostean, Foru plazan amaitu da. Traktoreek zabaldu dute bidea, eta haien atzetik joan dira manifestariak eta protestararako erabili dituzten elementuak. Asko izan baitira: haize errotak, herrien izenak zizelkatuta zeramaten hilarriak, politikari edo enpresari mozorrotutako pertsonak, eta baita elefante zuri bat ere, beste hainbaten artean.

Aldarriak ere ugariak izan dira bide guztian zehar. Pankarta nagusiaren atzean, besteak beste, AHT-aren, parke eolikoen, Gaubeako tomate negutegiaren, Urdainbaiko Guggenheimen, erraustegiaren edo gaitasun handiko autopista elektrikoen aurkako pankartak ikus zitezkeen.

Hain zuzen ere, proiektu horien aurkako protesta batzuk ekarri dituzte gogora Nafarroa Energia Eraldatzen taldeko Nuria Madotzek, Bizkaiko Interkonexio Elektrikoari Ez taldeko Alvaro Camposek Ipar Eusal Herriko Ostia elkarteko Ellande Alfarok, manifestazioa erdi-bidean zela. Amaieran, aldiz, Sami komunitateko kide batek Statkraf enpresak —Euskal Herrian hainbat parke eoliko eraiki nahi dituen bera— eraiki nahi duen parke eolikoaren aurkako «borroka» izan du hizpide. Gogorarazi du auzitegiek ukatu egin ziotela baimena, baina enpresak entzungor egin duela. Azaldu du bi urte daramatela epaia bete eta azpiegitura desmuntatu dezatela eskatzen.