Euskal Herriko Pentsiodunen Mugimenduak deituta (EHPM), Hego Euskal Herrian gutxieneko pentsioa 1.080 eurora iristeko eskatuko dute gaurtik ostegunera Gasteizera egingo dituzten oinezko martxen bitartez.
Gaur eguerdian bi martxa abiatu dira, Bilboko eta Bergarako (Gipuzkoa) udaletxeen paretik.
Bihar, berriz, Aguraingo taldea abiatuko da, udaletxetik hura ere.
Hiru zutabeak Gasteizen bilduko dira, ostegunean, Karlos I. plazan, eta handik manifestazio bat egingo dute. Autobusez joandako pentsiodunak batuko zaizkie.
Martxen bitartez, eskatu nahi diete euskal erakundeei gutxieneko pentsioak 1.080 euroraino osatzeko. Halaber nahi dute Espainiako Gorteetan ordezkaritza duten alderdiek pentsioen azken erreformaren lege proiektuaren eztabaida baliatzea erretiro adina berriro 65 urtetan jartzeko eta pentsioa osorik jasotzeko kotizatu beharreko urteak hamabostera jaisteko.
EHPMren arabera, erreformaren ondorioz gutxienez 743 euroko pentsioa jasoko du aurten ezkontidea ardurapean ez duen pentsiodunak, hamalau ordainsaritan. Azken erreformaren bitartez, 873 eurora igoko da 2027rako.
