Negoziazio kolektiboa
CCOOk ere ez du sinatuko Gipuzkoako metalgintzako ituna
Negoziazioa «bahitzea» eta Adegirekin «pribatuan» negoziatzea egotzi dio ELAri.
Sindikatuen aldetik, ELAren eta UGTren sinadura besterik ez du izango Gipuzkoako metalgintzako lan hitzarmen berriak. Duela egun batzuk, LABek gogor kritikatu zuen bi sindikatu horiek Adegirekin hitzartutakoa, eta espresuki aipatu zuen ELAk Gipuzkoako patronalarekin «aliantza» duela.
Ildo horri eutsi dio CCOOk ere, lan hitzarmen berria ez sinatzea «aho batez» erabaki duela azaltzeko argitaratu duen agirian: «ELAk negoziazioa bahitu du, eta pribatuan negoziatu du Adegirekin; negoziazio mahaia, berriz, antzerkitxo tamalgarri bat besterik ez da izan, eta zortzi ekitalditan antzeztu da akordioa».
CCOOk ziurtatu du Adegik ez duela beraiekin ezer negoziatu, «ez baitzaizkio inondik inora axola izan sindikatuak aurkeztutako planteamendu eta proposamenak».
Edonola ere, CCOOk onartu du hitzartutakoak «elementu positiboak» dituela, hala nola sektore osorako subrogazioa, transexualentzako eskubideak eta guraso bakarreko familien baimenen hobekuntzak.
CCOOren iritziz, ordea, akordioa zabaltzeko indarra zegoen, «hitzarmeneko urte bakoitzerako soldata igoera bermatuak ezarriz, in itinere istripuak aldi baterako ezintasuneko osagarrietatik kanpo utzi gabe, eta hitzarmenean ezintasun iraunkorreko aseguruak sartuta.
Gainera, CCOOk deitoratu du ELAk eta UGTk ez dutela soldata errealen igoerarik defendatu, Gipuzkoako metalean aurretik egindako akordioetan ez bezala, ez baitute KPIa bermatzen. «Gainera, kontratuak prekarizatzeko aukera oparitzen diote Adegiri, inolako erregulaziorik gabeko iraupen mugatuko kontratuak 12 hilabeteraino handituz».
Gehiengo osoa, UGTrekin
Metalgintzakoa Gipuzkoako lan hitzarmen garrantzitsuena da, zuzenean eta zeharka 45.000 langile ingururen lan baldintzak finkatzen baititu. ELAk du ordezkari gehien (%47,8), eta UGTren sinadurarekin (%4,3), gehiengo osoa duenez, hitzarmena langile guztiei aplikatuko diete. LABek ordezkaritzaren %35,8 dauka, eta CCOOk, berriz, %12,2.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
