Turkiako Gobernuak jakinarazi duenez, PKK Kurdistango Langileen Alderdiko «hogei kide inguru» hil zituen atzo, Kurdistanen egindako operazio batzuetan. «Terrorismoaren aurkako gure borroka geroz eta erritmo azkarragoan doa. Azken hilabetean 126 terrorista neutralizatu ditugu», adierazi du Hulusi Akar Turkiako Defentsa ministroak.
Gogor hitz egin du ministroak: «Terroristek bi aukera dituzte: desagertzea edo guk desagerraraztea», esan du. «Ez dago beste biderik». Turkiak hainbat operazio egin ditu azken asteetan Siriako Kurdistango YPG milizien aurka.
Hauteskunde garaia da Turkian —igandean egingo dute presidentetzarako eta parlamenturako bozen bigarren itzulia—, eta Recep Tayyip Erdogan presidentearen gobernuak kurduen aurkako erasoaldia indartu du. Duela hilabete, adibidez, Turkiako Poliziak ehun lagun baino gehiago atxilotu zituen, PKKrekin harremana dutelakoan. Lehen itzulian, botoen %49,5 lortu zituen Erdoganek; oposizioko zerrendaburu Kemal Kiliçdarogluk, berriz, %45.
