Arnaldo Otegi EH Bilduko koordinatzaile nagusia argi mintzatu da gaur goizean EAJk Gipuzkoako Aldundia gobernatzeko Eider Mendoza aurkezteko iragarri duen asmoaz. Igandeko hauteskundeetan, Maddalen Iriarte EH Bilduko hautagaiak lortu zuen boto gehien, eta, koalizioaren 22 batzarkideekin eta Elkarrekin Podemosek aurreratu duen babesarekin (bi batzarkide), eskura du EH Bilduk aldundia. EAJk (hamazazpi), baina, gehiengoa izango du PSEren batzarkideen (zazpi) babesaz gain PPkoena (hiru) ere jasotzen badu. «Gai izango al zarete Gipuzkoako Aldundia guri PPrekin kentzeko? Durango kendu behar al diguzue, non Vox erretiratu egin zen bere botoak PPri emateko eta non Miguel Angel Rodriguez, Ayusoren nagusia, etorri zen esatera bere misioa EH Bildu kentzea zela?».
Radio Euskadin elkarrizketatu dute Otegi goizean, eta adierazi du udal eta foru hauteskundeak mugarri bat izan direla. Azaldu duenez, haren ustez emaitzen interpretazio okerra egiten ari dira batzuk, eta esan du horien errua «jende guztiari» botatzen jarraituz gero hanka sartuko dutela. «Gipuzkoan eta Gasteizen EH Bilduren aurkako aliantza bat egiten ari dira PPrekin. Zer esan behar du PSOEk hamabost egun barru hauteskunde orokorretan, PP txarrena dela? Noiz bukatuko da jolasgaraia?». Horren ordez, «jendeak dituen arazo larriei konponbidea jartzeko», akordio zabalak egitearen alde mintzatu da Otegi, Espainiako eskuina kanpoan utziz.
Ikusi gehiago:Gipuzkoako foru hauteskundeetako emaitzak
Otegik gogoratu du lehen indarra izan direla Euskal Herrian hauteskunde hauetan, eta argudiatu du jendearekin konektatzea lortu dutelako izan dela hala. «Gu oso lasai gaude. Aldatzen ez diren printzipioak eta baloreak ditugu. Lehenengo, herria. Eskuinari ateak ixten dizkiogu. Jendearen interesak beste edozeren gainetik daude», adierazi du. Gogorarazi du lau urte daramatzala EH Bilduk Nafarroan eta Iruñean PSNrekin gauzak egiten. «Noiz bukatzen da jolasgaraia?», galdetu du berriro. «Jendea tontotzat hartzen dute». Berretsi du koalizioak ez diola utziko eskuinari gobernatzen, ezta Nafarroan ere. Gaineratu du EH Bilduk ez duela nahi eskuineko gobernu bat Madrilen, eta ez dakiela EAJren «karanbolen jolasean» aukera hori sartzen den.
Ikusi gehiago:Analisia. Iñaki Petxarroman: Gipuzkoako agintea eta arriskuak
