Handia da Alemaniaren pisua euroguneko ekonomian —BPGaren %28 ekartzen du—, eta horregatik esan ohi da Alemaniak hotza duenean eurogune osoak doministiku egiten duela. Bada, esaldi hori berriro baliagarria dela erakutsi dute Eurostaten azken datuek.
Estatistika bulego horrek zuzendu egin du joan den apirilaren bukaeran barne produktu gordinari buruz emandako datua. Orduan esan zuen euroguneak izkin egin ziola atzeraldiari, urtarriletik martxora hamarren bat hazi zela. Baina, orduz gero, Alemaniaren behin-behineko datua aldatu du Destatis hango estatistika erakundeak —%0tik -%0,3ra—, eta gauza bera egin behar izan du Eurostatek. Orain dio euroa duten hogei estatuetako ekonomia %0,1 txikitu zela urteko lehen hiruhilekoan. 2023ko azkenekoan ere datua hori izan zenez, atzeraldi teknikoan dago eurogunea —bi hiruhileko segidan hazkunde negatiboarekin—.
Eurostatek azaldu duenez, inflazio handiarengatik familien kontsumoa -%0,3 apaltzea izan da atzeraldiaren arrazoi nagusia, baina gastu publikoa ere asko jaitsi da, %1,6 hain zuzen ere. Enpresen inbertsioak, ordea, bilakaera positiboa izan du (+%0,6).
Alemaniako ekonomia ez ezik, Herbehereetakoa, Greziakoa, Maltakoa eta Estoniakoa ere txikitu egin ziren urteko lehen hiruhilekoan. Are gehiago uzkurtu zen Irlanda (-%4,6), baina haren BPGa zeharo puztuta dago han egoitza duten AEBetako multinazional handiengatik, eta horiek jabetza intelektualen etekinak Irlandatik atera izanak eragin du oraingo hondoratzea.
Euskal Herrian, atzeraldirik ez
Atzeraldirik ez dago Euskal Herrian. Eustatek joan den astean berrikusi zuen apirileko datu aurreratua, eta behera ez, gora zuzendu zuen: %0,5 hazi zen urteko lehen hiruhilekoan, 2022ko azkenekoarekin alderatuz gero. Nahiz eta Eustatek eta Nastatek oraindik berrikusi egin behar dituzten duela aste batzuk aurreratutako datuak. Nafarroako %0,3ko datua eman zuen duen aste batzuk, eta hilaren 23an da kalkulu osoagoak argitaratzekoa.
Hazkunde datu positiboak dituzte Italiak (+%0,6), Espainiak (+%0,5) eta Frantziak (+%0,4).
