Donald Trumpek jakinarazi du inputatu egin dutela Mar-a-Lagoko (Florida, AEB) luxuzko bere etxera baimenik gabe eraman zituen sekretupeko dokumentuengatik. 2017tik 2021era Etxe Zuriko maizterra izandakoaren arabera, auzia ikertzeko Justizia Departamentuak izendatutako fiskal berezi Jack Smithek delitu federalak egozten dizkio, eta Miamiko (Florida) epaimahai batek akusazioa onartu du. Beraz, aurrenekoz inputatu dute AEBetako presidente bat delitu federalak leporatuta, eta datorren astearterako hitzordua jarri diote Miamiko Auzitegi Federalean.
Joan den abuztuan atzeman zituzten dokumentu horiek Mar-a-Lagon, eta FBI Ikerketa Bulego Federalak handik eraman zituen. Espioitza legea urratzea egotzita, ikerketa bat hasi zuten AEBetako presidente ohiaren aurka. Justizia Departamentuak ez du jakinarazi zer leporatzen dioten, baina, CNN telebista katean, Trumpen abokatuetako batek aurreratu du zazpi direla delituak: besteak beste, konspirazioa, justiziari traba egitea, espioitza legea urratzea, eta segurtasun nazionalerako dokumentuak iruzurra eginez atxikitzea.
Ikusi gehiago: FBIk sekretupeko dokumentuak eraman ditu Trumpen Mar-a-Lago etxetik
Sare sozialen baten bidez eman du Trumpek inputazioaren berri, eta «Bidenen administrazio ustela» egin du gertatutakoaren erantzule. FBIk iazko abuztuan zehaztu zuenez, Etxe Zuriko maizter ohiaren luxuzko etxetik eraman zituzten, besteak beste, hogei kutxa baino gehiago guztira, argazki koadernoak, eskuz idatzitako ohar bat, «Frantziako presidentearekin» lotutako informazioa eta sekretupeko dokumentuen zenbait sorta. Horren harira, Trumpek gogoratu du Joe Bidenek «1.850 kaxa» dituela bere etxeetako batean. Aintzat hartu behar da AEBetako presidentearen etxe batean ere sekretupeko dokumentuak atzeman zituztela aurreko urtarrilean.
Trump da 2024ko presidentetzarako hauteskundeetan Alderdi Errepublikanoaren presidentegaia izateko hiru hautagaietako bat, Mike Pencerekin eta Ron Desantisekin batera, eta primario horiek irabazteko faborito nagusia da, gainera. Bidenek ere jakinarazi du Alderdi Demokrataren presidentegaia izango dela.
Ikusi gehiago:Trumpi 34 delitu leporatu dizkiote, enpresa kontuak faltsutzeagatik
Oraingo inputazioaren aurretik, 34 delitu egotzi zizkioten apirilean, enpresa kontuak faltsutzeagatik. Orduan adierazi zuen «sorgin ehiza bat» dela bere aurkako prozesua. New Yorkeko epaile baten aurretik igaro zen, eta epaile horrek, Juan Manuel Merchanek, 2024ko martxoaren 25erako ezarri du epaiketaren hasiera. AEBetako presidentetzarako bozak urte horrexetako azarorako daude deituta. Trumpek errugabea dela esan zuen orduan, eta gauza bera esan du gaur.
