Epai historiko bat eman du Mexikoko Auzitegi Gorenak. Erakunde feminista batek aurkeztu zuen babes helegite bat aho batez onartu du, eta, modu horretan, maila federalean, babes konstituzionala eman dio abortatzeko eskubideari. Abortuaren kontra Mexikoko Zigor Kodean dauden neurriak konstituzioaren kontrakoak direla ebatzi du, eta «emakumeen eta umeak sabelean hazteko gaitasuna duten pertsonen giza eskubideak urratzen» dituela argudiatu du.
Erabaki horren ondorioz, Mexikoko Gizarte Segurantzaren Institutuak eta Mexikoko Estatuko Langileen Segurantza eta Gizarte Zerbitzuen Institutuak abortatzeko eskubidea bermatu beharko dute. «Erabaki honen bidez, herrialdeko erakunde federal guztiek zerbitzu hori eskaini beharko dute», adierazi du ohar batean Gire erakunde feministak.
Zehazki, Zigor Kodeko 330., 331., 332., 333. eta 334. artikuluen kontra egin zuten babes helegitean. Horien bidez, espetxe zigorra ezarriko zaie abortatzen dutenei eta abortua egiten duten osasungintzako langileei. Horiek guztiak baliogabetu ditu Auzitegi Gorenak, eta erabakiak atzerako eragina izango du; alegia, espetxean daudenak aske geratuko dira, Milenio egunkariaren arabera.
Auzitegi horrek azken bi urteetan bi aldiz egin du abortatzeko eskubidearen alde, Coahuilan eta Sinaloa estatuetan. Horiek aurrekariak izan ziren, eta gero beste estatu batzuetara hedatu zen neurria. Bart gauean hartu duen erabakiaren bidez, ordea, maila federalera zabaldu da.
