Albistea entzun

komunikazioa

Amazonen jabeak 'The Washington Post' egunkaria erosi du

'Watergate auzia' , Pentagonoaren paperak eta Obamaren espioitza programa ezagutarazi dituen egunkaria saldu du Graham familiak, 1933az geroztiko jabeak. "Bizirik iraun zezakeen gure eskuetan; irabaziak ere izan zitzakeen. Baina hori baino zerbait gehiago nahi genuen", esan dute orain arteko jabeek.

Jon Ordoñez Garmendia -

2013ko abuztuak 6

Ezustean atzo gauean jakinarazi zuen The Washington Post AEBeko egunkaria editatzen zuen konpainiak, The Post Company-k, Jeffrey P. Bezosek erosi duela AEBeko egunkari historikoa. 60 egunetan gauzatuko da salmenta, eta Amazoneko jabeak 190 milioi euro inguru ordainduko ditu. Horrekin batera The Washington Post-i lotutako beste zenbait aldizkari ere eskuratuko ditu Bezosek.

Graham familiaren azken lau belaunaldien esku egon da The Washington Post 1933tik. "Iritsi da nik eta nire familiak inoiz iritsiko ez zela uste genuen eguna. The Washington Post Company-k salgai jarri du azken zortzi hamarkadetan jabe izan den eta landu duen egunkaria", esan du Katharine Weymouth-Grahamek, sortzailearen iloba eta egunkariaren editore eta zuzendariak.

Arduradun aldaketarik ez

Bezosek iragarri du egunkariaren kudeaketan orain arte aritu diren arduradunek jarraituko dutela, eta Seattletik ez eramateko konpromisoa hartu du. "Noski, aldaketak izango dira hurrengo urteetan. Beharrezkoa da eta hori gertatuko zen lehengo jabeek saldu izan ez balute ere", adierazi die Amazoneko jabeak egunkariko langileei. Iragarri du, aldi berean, egunkarian Amazon ez dela tartean izango.

2012. urtean 53,7 milioi dolarretako galerak izan zituen AEBetan zer esan handia izan duen egunkariak, 2011n baino bi bider baino gehiago. The Post konpainia sekretuan ari zen erosle baten bila. "Azken hamarkadan egunkari hau ez da gai izan egunkariek jasan dituzten finantza gora-beherei aurre egiteko". Ezegonkortasun hori Interneten gorakadari eta paperetik digitalera izan den eraldaketari leporatu dio.

"Asmatu beharra"

Bezosek eman du pausoa. 49 urte ditu, eta hemeretzi daramatza Amazonen buruan. Bere helburua papereko egunkariari haize berria ematea da. "Asmatu beharra daukagu, eta horrek esan nahi du esperimentatu egin behar dugula". Aitortu du Bezosek kazetaritzaren munduan ezjakina dela, baina gogotsu dagoela esan du, eta optimista dela.

Mackenzie Bezos idazlearekin ezkonduta dago eta Washingtonen homosexualen eskubideen alde agertu dira, tartean, 2,5 milioi dolar emanez horien ezkontzaren alde lan egiten duen elkarte bati. Princetongo Unibertsitatean ikasi zuen Jeff Bezosek, eta Wall Streeten hasi zen lanean. Lan hori utzita, ordea, buru belarri hasi zen bere etxeko garajetik Interneten liburuak saltzen.

1994an Amazon.com sortu zuen, eta hiru urte geroago burtsara atera zen konpainia. 2001a arte ez zuen irabazirik izan, baina gaur egun Interneteko salmentaa konpainia handiena da. Adituek diote epe luzeko arrisku handiko proiektuak nahi izaten dituela. Pasa den martxoan Neil Armstrong eta Buzz Aldrin astronautak ilargira eraman zituen Apolo 11 suziaren motorrak atera zituen Atlantikotik, 1969tik urpean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

URAK EZ DARAMATZAN ARAUAK

Imanol Magro Eizmendi

Kontrolatu al daiteke langileek komunean pasatzen duten denbora? Tarte hori atsedena da, edo lan denbora? Legezkoa al da baimena eskatu behar izatea? Legeak laneko komunerako bueltak nola arautzen dituen aztertu dute zenbait adituk, eta horrekin lotutako auziak eta lan gatazkak azaldu.

LABen elkarretaratzea Donostian, lan ikuskaritzak salatutako tabernaren aurrean ©Gotzon Aranburu (Foku)

Ostalaritzako «lan esplotazioa» salatu du LABek

Berria

Sindikatuak elkarretaratze bat egingo du Donostian atxilotutako enpresaburuen jatetxe baten aurrean.

Robert Habeck Alemaniako Ekonomia ministroa, iragan astean. ©FILIP SINGER / EFE
LABeko kideak, Sernaren atarian. ©LAB

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...