Albistea entzun

Zinema

Denzel Washingtonek Donostia saria jasoko du Zinemaldian

Saria jasotzearekin batera, Antoine Fuquaren 'The Equalizer' filma aurkeztuko du aktoreak inaugurazio ekitaldian, Sail Ofizialean, lehiaketatik kanpo.

Denzel Washington aktore estatubatuarrari emango diote Donostia saria.
Denzel Washington aktore estatubatuarrari emango diote Donostia saria. Zipi / EFE

Berria -

2014ko uztailak 23

Antoine Fuqua zuzendari eta Denzel Washington aktore nagusi dituen The Equalizer filmak emango dio hasiera, lehiaketaz kanpo, aurtengo Donostiako Zinemaldiari, irailaren 19an, antolatzaileek jakinarazi dutenez. Aktoreak eta zuzendariak aurkeztuko dute filma, Kursaal auditoriumean.

 Inaugurazio ekitaldi horretan, Donostia saria emango diote Denzel Washingtoni, bere ibilbide osoaren aintzatespen gisa.



Denzel Washington Mount Vernonen sortu zen (New York, AEB), 1954an. Carbon Copy filmean lan eginez hasi zen zinemaren munduan lanean, 1981ean. 1987an Stephen Biko ekintzaile hegoafrikarraren rola jokatu zuen Richard Attenboroughen Cry Freedom filmean; bigarren mailako gizonezko aktore onenaren Oscar sarirako hautagai izendatu zuten lan harengatik. 1989an Edward Zwicken Glory filmean parte hartu zuen, eta orduan hautagai ez ezik sari horren irabazle ere izendatu zuten. Beste Oscar sari bat ere irabazi zuen gero, gizonezko aktore onenarena, Antoine Fuquaren Training Day filmean (2002) egindako lanarengatik. Aurretik gizonezko aktore onenaren sarirako hautagai izendatua izan zen beste bi filmetan egindako lanarengatik: Sopike Leeren Malcolm X (1992) eta Norman Jewisonen The Hurricane (1999); eta geroztik ere beste behin, Robert Zemeckisen Flight filmean egindako lanarengatik (2013).

Orotara, beraz, bi Oscar sari ditu irabaziak (bigarren mailako gizonezko aktorearena bata, gizonezko aktore onenarena bestea) eta beste lau bider ere hautagai izana da (behin bigarren mailako gizonezko aktore onenaren sailean eta hiru gizonezko aktore onenaren sarian). 

Denzel Washingtonek McCall pertsonaiaren rola jokatzen du The Equalizer filmean. Bere iragan misteriotsua atzean utzi duela pentsatuz bizimodu berri bat hasi duen gizona da McCall. Baina Teri ezagutzean (Chloe Grace Moretz), gangster errusiar ezin bortitzagoen kontrolpean dagoen neska gaztea, ezingo du ezer egin gabe geratu; lagundu beharra sentituko du. Babesgabeei bortizki erasotzen dietenez mendekatzea ahalbidetzen dioten gaitasun ezkutuez baliatuz, McCallek bere buruari ezarritako erretiroa utziko du eta justizia egiteko desioa berpiztuko zaio. Norbaitek arazoren bat baldin badu, zoria bere aurka baldin badago, ez badu nora jo, McCallek lagunduko dio. Bera, izan ere, The Equalizer da.

Richard Wenk da gidoiaren egilea, eta Michael Sloan eta Richard Lindheimek sortutako izenburuko bereko telesaila izan du lanerako oinarri. Ekoizleen artean Denzel Wasington dago, Todd Black, Jason Blumenthal, Alex Siskin, Steve Tisch, Mace Neufeld, Tony Eldridge eta Michael Sloan
ekin batera
.

Antoine Fuqua zuzendariak 1998koa du lehen film luzea: The Replacement Killers. Akziozko dramak zuzendu ditu batik bat, aktore ezaguna izanik bere aginduetara: Jamie Foxx (Bait, 2000), Bruce Willis eta Monica Bellucci (Tears of the Sun, 2003), Clive Owen eta Keira Knightley (King Arthur, 2004), Mark Wahlberg (Shooter, 2007), Richard Gere eta Ethan Hawke (Brooklyn's Finest, 2009) eta Gerald Butler eta Morgan Freeman (Olympus Has Fallen, 2013).

2001ean, Training Day zuzendu zuen Fuquak, Denzel Washington protagonista zuela. Hamahiru urte geroago, Washingtonek eta Fuquak berriz ere bat egin dute, Sony Pictures Entertainment etxeak banatuko duen thriller honetan. Zinema areto komertzialetan urriaren 17an estreinatuko da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Iñaki Uriarte arkitektoa. ©MARISOL RAMIREZ / FOKU

HANDITZEA TXIKIZIOA DELAKOAN

Iñigo Astiz

EAEko Ingurumen eta Hirigintza fiskalak tramiterako onartu du Bilboko Arte Ederren Museoa handitzeko proiektua geldiarazteko eskaria. Iñaki Uriarte arkitektoa buru, herri mugimendu batek salatu du ustezko irregulartasun eta lege hauste «multzo bat» egon dela Norman Fosterren proposamenean eta hura onartzeko prozesuan.
Aldoux Huxley, 1930ean. ©DOROTHY WILDING / LONDRESKO NATIONAL PORTRAIT GALLERY

Hilketa politikoa: teorian eta praktikan

Gorka Arrese

Aldous Huxleyren 'Bai mundu berria' euskaraz argitaratu zela 50 urte dira. Beste bat da, ordea, idazle ingelesaren nobelarik konplexuena eta anbizio handikoena: 'Point Counter Point', intriga paraleloekin eta argumentuen kontrapuntuaz.

Gerlaren gizalegea

Irati Majuelo

Idazlea: Slavenka Drakulic. Itzultzailea: Amaia Apalauza. Argitaletxea: Txalaparta.

Ezohiko atsegina

Imanol Mercero

Idazlea eta ilustratzailea: Adrien Albert. Itzultzailea: Bego Montorio. Argitaletxea: Astiberri.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.