Araban, udaren amaiera Zeledonen agurrak, patata uztak eta mahats bilketak markatzen dute. Alabaina, ustekabean desagertzen diren txanponak eta hegan egiten duten kartak ere ekartzen ditu ikasturte hasierak.
Izan ere, MagialdiAraba jaialdiak lurraldea zeharkatuko du, gaurtik irailaren 14 bitarte. Berantevillan abiatuko da, eta bertze hamazazpi herritako plazak ere sorginduko dituzte Euskal Herriko aztiek. Arabako Ilusionisten Elkarteak antolatzen du, irailaren 15ean Gasteizen hasiko den 37. Magialdiaren atariko gisa. Egitasmoa egonkortuz joan da, eta aurten 11. aldia izanen da.
Aurten, guztira, hemezortzi herritatik igaroko da bira. Berantevillan hasiko da, eta Kontrastan amaitu. Tartean, Pipaon, Azazeta, Lantziego, Uribarri Ganboa, Artziniega, Gillerna, Ribabellosa, Villabuena, Pobes, Bergantzu, Laudio, Ondategi, Eltziego, Burgu, Oion eta Guardia bisitatuko dituzte, hurrenez hurren.
Mota anitzetako ekintzak antolatu dituzte, hala nola magia tabernetan, haurrentzako tailerrak euskaraz eta emanaldi orokorrak. Euskal Herriko sei magok beren trikimailu onenak erakutsiko dituzte; Asier Kidamek, Tor magoak, Hodei magoak, Imanol Ituiñok, Txoborro magoak eta Altrius magoak.
Ituiño magoarentzat «berezia» da herri txikietarat joatea: «Herritarren normaltasunetik kanpo dagoen ikuskizun bat eskaintzea oso polita da». Ekitaldiak «harrena ona» edukitzen duela adierazi du, eta adin guztietako jendea bertaratzen dela: «Aitona-amonak eta 3 urteko umeak biltzen dira, baita tarteko guztiak ere».
Magia haurrentzako gauza dela erran ohi da, baina, Ituiñoren hitzetan, gehiago da helduentzat: «Mago batek ezin dio aurre egin Olentzerok Euskal Herrian egiten duen magia handi horri. Beraz, gure magia helduei zuzenduta dago, baina haurrek ere parte har dezakete, noski».
«Harry Potterrek egiten duena magia da, baina baita ilusionistok egiten duguna ere. Guk, tranpa baten bitartez, ezinezkoa den zerbait benetako bihurtzen dugu»
IMANOL ITUIÑOMagoa
Hitzak berak ere «esanahi zabala» duela aitortu du: «Harry Potterrek egiten duena magia da, baina baita ilusionistok egiten duguna ere. Guk, tranpa baten bitartez, ezinezkoa den zerbait benetako bihurtzen dugu».
Txikitatik eduki du Ituiñok magia egiteko grina, eta 14 urte zituela Bilboko magoen elkartean sartzea erabaki zuen: «Bat-batean ikusi nuen ez nintzela horren zomorro arraroa, eta bazegoela jende gehiago nire zaletasun bera zuena». Elkartearekin «zorretan» dagoela aitortu du: «Ume bat besterik ez nintzela hartu ninduten, eta pila bat ikasi dut eurengandik».
Gaurdaino, kartak izan dira Ituiñoren erreminta fidelena: «Kartekin hasi nintzen, objektu malgua, merkea eta eramateko erraza delako eta truko asko egin daitezkeelako». Umorea ere tresna gisa erabiltzen duela esplikatu du: «Beti saiatzen naiz modu sinpatiko batean aurkezten, iruditzen baitzait magiak komikotasun puntu bat duela».
Maratoiaren segida
Ikuskizunen maratoiak segida izanen du, Gasteizko 37. Magialdiak hartuko baitio lekukoa. Ilusiorako eszenatoki handi bihurtuko da hiriburua irailaren 15etik 21era bitarte, eta bi jaialdien artean 25 programazio egun izanen dira guztira.
Gasteizko publikoa «magian jantzia» dagoela erran du Ituiñok: «Ez dut esango adituak direnik, baina eskarmentua dute. Exijenteagoak dira, eta aurtengo ikuskizunak iazkoekin alderatzen dituzte».
«Mundu osoko profesionalak elkartzeko topagunea da Gasteiz. Lagun batzuk urtean behin bakarrik ikusten ditut», azaldu du magoak. Inbidiak alde batera utzita, trukoak ikasteko ere parada «ezin hobea» dela iritzi du Ituiñok: «Konferentziak, hitzaldiak eta liburuen aurkezpenak baliatzen ditugu gauzak partekatzeko, baita sekretuak nola hobetu ere».
Izan ere, ez dute denborarik galtzen disimuluetan, ikuskizunetarako uzten dituzte ezkutaketa jolasak: «Sekretua, noski, gorde beharreko gauza da, baina ez dago sekretismoetan ibili beharrik gure artean. Giroa osasuntsua da, eta auzolanean aritzen gara».
