Beste lau. Lehia moduko bat bihurtu da gastronomia arloko Michelin izarrena, eta Hego Euskal Herriko jatetxeek goi mailan jarraitzen dute. Atzo iluntzean egin zuten Michelin izarrak banatzeko gala, Malagan (Espainia), eta Hego Euskal Herriko lau jatetxek lehen aldiz jaso zuten Michelin izar bat: Mungiako Bakea jatetxeak (Bizkaia), Bilboko Islaresek, Zornotzako La Reveliak (Bizkaia) eta Donostiako Itzulik. Alatz Bilbao da Bakeako sukaldaria, Julen Bergantiños Islaresekoa, Fernando Gonzalez La Reveliakoa, eta Iñigo Lavado Itzulikoa. Lavadok duela urte erdi eskas zabaldu zuen jatetxea, Igeldon.
Koska bat gorago, orain arteko hiruna izarrei eutsi diete Arzak jatetxeak (Donostia), Akelarrek (Donostia), Martin Berasategik (Lasarte-Oria, Gipuzkoa) eta Azurmendik (Larrabetzu, Bizkaia).
Izar berdeak ere banatzen dituzte urtero-urtero, gastronomia jasangarria saritzeko, eta bost izar berde horietatik lau Hego Euskal Herriko jatetxeek jaso zituzten: Tolosako (Gipuzkoa) Amak (Gorka Rico eta Javier Ribero), Villabona-Amasako Hikak (Roberto Ruiz), Mungiako Bakeak eta Dimako (Bizkaia) Garenak (Julen Baz).
