Egunerokoak bizi ditu, sari eta izar artetik mahai ingurura joatea nahiago izaten dute gehienek, baina izendapenak ere ongi etorriak izaten dira gehienentzat. Atzo iluntzean banatu zituzten Espainiako Repsol gidaren eguzkiak, Cartagenan (Espainia), eta, Hego Euskal Herriko jatetxeei dagokienez, lehen aldiz bi eguzki jaso dituzte Tolosako Ama eta Casa Julian jatetxeek. Zerrenda horretan badira eguzki bat lehen aldiz jaso duten jatetxeak ere: Araneta (Zestoa, Gipuzkoa), Aiten Etxe (Zarautz, Gipuzkoa), Islares (Bilbo), Txispa (Atxondo, Bizkaia) eta Bakea (Mungia, Bizkaia).
Berritasunak dira horiek, baina Hego Euskal Herriko beste hainbat jatetxek eutsi egin diete euren eguzkiei. Guztira, 83 jatetxe saritu zituzten atzo. Repsol gidako eguzki bat daukate horietatik 55ek, bi eguzki dauzkate 25 jatetxek, eta hiru eguzki dituzte zortzik: Akelarre (Donostia), Arzak (Donostia), Azurmendi (Larrabetzu, Bizkaia), Elkano (Getaria), Etxebarri (Axpe, Bizkaia), Martin Berasategi (Lasarte-Oria, Gipuzkoa), Mugaritz (Errenteria, Gipuzkoa) eta Nerua Guggenheim Bilbao (Bilbo).
Horiek alde batera utzita, aipamen berezia jaso dute, besteak beste, Lur jatetxeak (Legazpi, Gipuzkoa) eta La Revelia jatetxeak (Zornotza, Bizkaia). Eguzki jasangarria ere jaso du azken horrek.
