Igeri lehenik, 150 metro, Zarauzko portutik (Gipuzkoa) malekoiraino. Bizikletan gero, zazpi kilometro, Getariara (Gipuzkoa) iritsi aurreko biribilguneraino. Munoara itzuli, lokarriak lotu, eta kilometro eta erdiko korrika saioa azkenik. Elkarri eskutik heldu, eskuak altxatu, eta helmuga zeharkatu dute. Besarkada elkarri, bostekoa antolatzaileei. Ez dira profesionalak, baina amaitu dute Zarauzko Bik Tri Marmarra, bikote mistoen herri triatloia. BERRIA babesleetako bat da.
Malekoian batera eta bestera dabil Laura Olabarria, triatloiaren antolatzaileetako bat. Triatloia «beste modu batean» bizitzeko helburuz sortu zuten proba, duela lau urte: «Nik Tri triatloi elkartean uste dugu badagoela beste modu bat triatloiaz disfrutatzeko; ez beti lehiakortasunaren ikuspegitik. Ideia ona iruditu zitzaigun bikotekidearekin, aitarekin, amarekin, lagun batekin... triatloia lehen aldiz probatzeko antolatzea».
Ez baitago ez podiumik, ez irabazlerik. Triatloia probatu eta hartaz gozatu nahi duen jendea bakarrik. Eta badu beste berezitasun bat: bikoteka egiten dela, eta emakume batek eta gizon batek osatu behar dutela bikotea, nahitaez: «Emakumeek eta gazteek triatloiaren munduan parte hartzea bultzatu nahi dugu. Hala, parte hartzaileen erdiak beti izango dira emakumeak».
Hain zuzen, nabaritu egin dute herri triatloiaren eragina. 570 lagunek parte hartu dute aurtengoan, eta ikusi dute askori zaletasuna pizteko balio diela. «Ikusi dugu ondorengo urteetan triatloiak egiten hasi direnetako batzuek lasterketa honetan parte hartu zutela lehen aldiz. Horrek ilusioa egiten digu».
Lehen aldiak
16:00etan hasi da proba, baina eguerdirako iritsi dira parte hartzaile asko, dortsalak hartzera. Bizikletaz betetzen hasi da malekoia; kaskoak buruan eta ilusioa aurpegian duela ibili da jendea. Dortsalen zerrendara joan dira, hamabost bikoteko multzoetan abiatuko direnez, zer txanda egokitu zaien ikusteko.
Parte hartzaileetako bi dira Fernanda Fleischmann eta Carlos Velar. Gasteizko Aloha triatloi taldeko kideak dira, eta ibilbide oparoa dute probetan. Gaurkoan, ordea, taldekide berriekin probaz gozatzea da asmoa. «Aurten neska asko gehitu dira taldera, eta proba honetan parte har dezaten etorri gara, herri triatloia delako. Trantsizioak nolakoak diren ikusteko, ikasteko...», esan du Velarrek.
Binaka errazago egiten baita igeri, korrika eta bizikletan, Fleischmannen ustez. «Proba egin dezaten eman dugu izena. Proba motza da, binaka egiten da... Triatloiari beldurra kentzeko balio du». Beldurra kentzeko, eta grina pizteko.
