Herria inarrosi duten bi gertakari izan dira Santurtzin (Bizkaia) azken urtean: batetik, udaltzain lanpostu bat betetzeko prozesuan, iaz, irregulartasunak egon ote ziren argitzeko ikerketa bat abiatu zuten; bestetik, duela bi hilabete udaltzain batek taser pistolarekin egin zion eraso herriko gazte bati, eta handik ordu gutxira hil egin zen. Bi gertakari horiek lotura estua dute Santurtziko Udaltzaingo taldearekin, eta, testuinguru horretan, dimisioa eman du Santurtziko Udaltzaingo taldeko buru Ibon Iturraspek.
El Correo egunkariak eman du dimisioaren berri. Horren arabera, Iturraspek argudiatu du «arrazoi pertsonalak tarteko» hartu duela erabakia. Santurtziko Udalak onartu egin du haren kargu uztea, baina are gehiago nahastu da giroa, oraingoa ez baita azken urtean udalean egon den aurreneko dimisioa. Lehenik, Segurtasun zinegotzi zen Sonia Lopez kargugabetu zuten 2025eko urrian, Lopezek berak hala eskatuta; gero, Karmele Tubillak (EAJ) alkatetza utzi zuen otsailean, «arrazoi pertsonal, politiko eta profesionalak» argudiatuta. EAJko kide Itziar Carrocerak ordezkatu zuen Tubilla.
Udaltzain lanpostu bat betetzeko prozesuan gertatutako ustezko irregulartasunen polemika horretan bete-betean egondakoa da Iturraspe. Azterketak zuzentzeko epaimahaikideetako bat zen, eta auzia argitara atera zenean, aitortu zuen «eten» egin zela azterketako galderak «gainbegiratzeko» ardura zuten langileen katea. Are, El Correo-k zehaztu duenez, Iturraspek berak onartu izan du Lopezi bidali zizkiola galderak, «itzul zitzaten». Santurtziko Udalak barne ikerketa bat abiatu zuen gertatutakoa argitzeko, baina prozesua bukatutzat jo zuen apirilean.
Anderren auzia
Ustezko irregulartasunaren mamuak herrian dirau, baina duela bi hilabeteko gertakariak are gehiago zapuztu du giroa. Santurtziko Udaltzaingoak taser pistola bat erabili zuen Ander S.T. 30 urteko gizonezkoa «mendean hartzeko», Santurtziko Segurtasun zinegotzi Imanol Urrutxuak argudiatu zuenez. Erasoa gertatu eta bi egunetara, baina, Ander S.T. hil egin zen. Gaztearen heriotzak haserre handia eragin zuen bai herrian, bai Euskal Herriko beste hainbat herritan, eta zenbait manifestazio egin zituzten hurrengo egunetan, «Anderrentzat justizia» eta Poliziaren jardunaren gaineko «ikerketa bat» exijitzeko.
