Lanbide Heziketak gero eta garrantzi handiagoa du gaur egungo industriaren eta gizartearen eraldaketan. Testuinguru horretan, Bergarako (Gipuzkoa) Miguel Altuna Lanbide Heziketako Ikastetxe Integratua erreferente bihurtu da berrikuntzaren, teknologiaren eta prestakuntza aurreratuaren alorrean. Haren helburua argia da: etorkizuneko profesionalak prestatzea, ezagutza tekniko sendoa ez ezik, ikuspegi kritikoa eta giza balioak ere kontuan hartuz.
Ikastetxearen prestakuntza ereduak hiru ardatz nagusi uztartzen ditu: teknologia aurreratua, ikaskuntza praktikoa, eta lankidetza estua enpresekin. Ikasleek ez dute soilik teoria ikasten; benetako lan inguruneetara hurbiltzen dira, eta, hala, egungo industriaren erronkei aurre egiteko gaitasunak garatzen dituzte. Gaur egun, ezinbestekoa da teknologia berriak ezagutzea eta erabiltzea, baina baita horien inguruan hausnartzeko eta modu kritikoan aplikatzeko gaitasuna izatea ere.
Ildo horretan, Miguel Altuna erreferente bihurtu da berrikuntzan, bai Euskal Herrian, bai Espainiako estatu mailan eta nazioartean. Lanbide Heziketako beste ikastetxe batzuekin elkarlanean, hainbat proiektu teknologiko garatzen ari da. Horien artean nabarmentzen dira adimen artifizialean oinarritutako mantentze preskriptiboa, errealitate areagotua urruneko laguntza teknikoan aplikatzea eta errealitate birtualean biki digitalak garatzea. Ekimen horiek guztiek erakusten dute ikastetxea gai dela industria aurreratuaren abangoardian egoteko.
Gainera, Fabrikazio Automatizatuan Espezializatutako Lanbide Heziketako 75 Bikaintasun Zentroetako bat da. Aitortza horrek bermatzen du ikastetxean eskaintzen den prestakuntza kalitatezkoa dela eta lotura estua duela industria sektorearekin. Enpresek, izan ere, funtsezko rola jokatzen dute prestakuntza prozesuan, bai ikasleen heziketan, bai berrikuntza proiektuetan.
Nazioartekotzea ere bada Miguel Altunaren ezaugarri nagusietako bat. LCAMP (Learner Centric Advanced Manufacturing Platform) Europako proiektu estrategikoan parte hartzeak aukera ematen dio Europako erreferentziazko zentro, enpresa eta erakundeekin elkarlanean aritzeko. Horren bidez, prestakuntza programa berritzaileak diseinatzen dira, eta eskualdeko lankidetza eredu berriak garatu, helburu argi batekin: teknologia aurreratuetan trebatutako profesional malgu eta erresilienteak prestatzea.
Berrikuntza pedagogikoaren adibiderik nabarmenena Ikas Fabrika edo Learning Factory ikasketa metodoa da. Ez da ohiko tailer bat; eskola barruan sortutako ekoizpen ingurune erreal bat da, non ikastea eta sortzea prozesu berean uztartzen diren. Sei heziketa ziklotako ikasleek elkarlanean lan egiten dute produktu bat garatzeko, eskaera jasotzen denetik azken emaitza lortu arte. Prozesu horretan, CNC makinak, robot industrialak, sistema automatizatuak, errealitate areagotua eta halako teknologiak erabiltzen dira.
Hala ere, teknologiak ez dira helburu hutsa. Prozesuak ulertu, aztertu eta hobetzeko tresna gisa erabiltzen dituzte ikasleek. Horrek pentsamendu kritikoa, arazoak konpontzeko gaitasuna eta talde lana sustatzen ditu. Ikas Fabrikak erakusten du berrikuntza teknologikoak benetako balioa hartzen duela pertsonak erdigunean jartzen direnean.
Erdi eta goi mailako heziketa ziklo ugari
Prestakuntza eskaintzari dagokionez, Miguel Altunak erdi eta goi mailako heziketa ziklo ugari eskaintzen ditu, baita espezializazio programa aurreratuak ere, hala nola Fabrikazio Adimenduna, eta Adimen Artifiziala eta Big Data. Programa horiek aukera ematen diete ikasleei urte bakarrean lan merkatuaren beharretara egokitzeko.
Azken batean, Miguel Altuna ikastetxea hezkuntza eredu berritzaile eta sendo baten adibide da. Teknologia, ikaskuntza eta pertsonak modu koherentean uztartuz, etorkizuneko profesionalak prestatzen jarraitzen du, industriaren erronkei erantzuteko prest eta gizarteari balioa emateko konpromisoarekin.
Hori guztia bertatik bertara ezagutu ahal izateko, eta instalazioak eta ekipamenduak nolakoak diren ez ezik zer eta nola ikasten den ikusteko, ate irekien jardunaldiak izango dituzte apirilaren 25ean eta maiatzaren 5ean. Informazio guztia www.maltuna.eus webgunean edo 943-89 92 70 telefono zenbakira deituz.
