Antxoaren kostera hasi zenetik, apirilean, 7.000 tona arrantzatu dituzte Bizkaiko eta Gipuzkoako arrantzaleek. Iaz aldi honetan baino gutxiago da, baina arrantzaleek ez dute balorazio txarrik egiten, iaz baino gehiago ordaindu dietelako lonjan. "Ez doa gaizki", esan dio Efe agentziari Miren Garmendia Gipuzkoako Arrantzaleen Kofradiako bozeramaileak. Bere datuen arabera, batez beste 2,7 eurotan ordaindu diete kiloa.
Arrantzaren gutxitzea eguraldiari egotzi dio Garmendiak, "antxoa egon badagoelako". Itsaso txarraren ondorioz aste batzuetan ez dira arrantzatzera irten ere egin. Azken egunotako eguraldi onari esker harrapaketak handituko direla espero du, baina zaila ikusten du aurtengo kuotara iristea (20.700 tona) kostera amaitzeko lau aste baino gutxiago falta direlako.
