Iraila hilabete oso ona izan zen Hego Euskal Herriko auto saltzaileentzat. Urteko joera apala hautsi egin zen, eta salmentek %16 egin zuten gora iazko iraileko datuekin alderatuta. 4.066 auto berri saldu ziren guztira, iaz baino 566 gehiago. Joera berezi nabarmena izan zen Nafarroan, hazkundea %38,1ekoa izan baitzen: aurten 1.048 auto berri saldu dituzte, eta iaz, 759.
Motorraren ezaugarriei erreparatuta, hibridoak izan ziren nagusi (%43,9); ondoren, elektrikoak (%26,9), eta, azkenik, hibrido entxufagarriak (%13,6). Datu horiek zehatz aztertuta, deigarria da Nafarroan auto elektrikoek izan zuten merkatu kuota: 449 saldu ziren, guztien %42. Nafarroan elektrikoak erosteko laguntzak handiagoak dira, eta haien eragina sumatzen da datuetan.
Eta urtea nola doa? Bada, irailera arte iazko lehen bederatzi hilabeteetan baino %2,8 auto berri gehiago saldu dira: 29.096 guztira. Araban, Bizkaian eta Gipuzkoan %3,5 egin du gora salmentak, eta Nafarroan %0,8. Iraileko bultzadarengatik ez balitz, Nafarroako datuak iazkoak baino apalagoak lirateke. Markei dagokienez, Toyota markak saltzen du auto gehien Hego Euskal Herrian.
