CNMC Merkatuen eta Lehiaren Espainiako Batzordeak ebatzi du 2019ko martxotik 2020ko abendura Naturgy enpresak argindarraren prezioa manipulatu zuela merkatuan, eta 41,5 milioi euro ordaintzera zigortu du. Horietako sei isunagatik izango dira, eta 35,5, berriz, kalte ordaina. El País-en arabera, Naturgy-k helegitea jarriko dio epaiari Espainiako Auzitegi Nazionalean.
Naturgyren eskumeneko Naturgy Generacion enpresari jarri diote isuna, elektrizitatea ekoizten duen sozietateari. CNMCk argitaratu duen oharraren arabera, 2019ko martxotik 2020ko abendura Galiziako Sabon 3 ziklo konbinatu zentroak sortutako elektrizitatea «gehiegizko prezioan» eskaini zuen Naturgy Generacionek, murrizketa teknikoen merkatuan zehazki. CNMCren arabera, epe horretan murrizketa teknikoen merkatuko lehia «urria» zen, eta egoera hori aprobetxatu zuen Naturgyk prezioak puzteko.
Hala, sistemaren operatzaileari, REE Espainiako sare elektrikoari, 35,5 milioi euroko kalte ordaina itzuli beharko dio 22 hilabetean, eta horrek diru hori erabili beharko du eskariari —familiei— eragindako kaltea ordaintzeko.
Elektrizitatearen merkatua
Oso merkatu berezia da argindarrarena. Izan ere, elektrizitatea une bakoitzeko eskariaren arabera produzitu behar da, gaur egun ez baitago elektrizitatea maila handian metatzeko sistema eraginkorrik. Hori dela eta, enpresek pool merkatuan eguneko eskariaren aurreikuspenak egiten dituzte, eta hor hitzartzen dituzte eguneko ordu bakoitzeko kantitateak eta prezioak, baina eskaria zehazki zein den ezin denez jakin, une oro energia produkzioa moldatu behar da, banaketan arazorik ez egoteko.
Hor sartzen dira murrizketa teknikoen merkatuak eta beste batzuk, moldatu eta orekatu egin behar baitira eskaintza eta eskaria.
