«Lehiakortasuna indartzea nazioarteko lehia handiko egoera batean»: horixe da Arabako, Bizkaiko eta Gipuzkoako egurraren industriaren erronkarik handiena datozen urteetan, Oskar Azkarate Baskegur Euskadiko Egurraren Elkarteko zuzendari nagusiak adierazi duenez. Horretarako, arloko enpresak «modernizazioan» urratsak egiten ari direla azpimarratu du, «tokiko baliabideak balio erantsi handiagoko produktu bihurtzeko».
Azkarateren ustez, EAEko egurraren industria «Europa hegoaldeko sendoenetako bat» da, eta badu ezaugarri bat «adibidez Espainiakoak ez duena»: egur gehiena bertako basoetatik eskuratzen du; zehazki, erabilitako egurraren %70. Garrantzia eman dio horri, haren esanetan jasangarritasunari dagokionez atzerritik egur gehiago eskuratzeak karbono aztarna handiagoa eragiten baitu.
Industria sendo egonagatik ere, enpresa ugarik egurra atzerrian saldu behar izaten dutela ohartarazi du Azkaratek —Katalunia, Erresuma Batua eta Frantzia aipatu ditu—, Euskal Herrian ez baitute horretarako aukera handirik. Halere, sektorea «baikor» dago etorkizunera begira: «Egurraren merkatuak geroz eta gehiago eta handiagoak dira».
Apustu sendoa
Aurrera begirako erronkei buruz, egurraren sektoreko patronaleko buruak gogoratu du Eusko Jaurlaritzak Euskadiko Egurraren Plan Estrategikoa aurkeztu berri duela: horren arabera, datozen lau urteetan 225 milioi euro mobilizatzea aurreikusten du —45 milioi euro inbertsio publikotik eta beste 180 milioi ekarpen pribatuetatik eratorriak—. Besteak beste, planak xede du basoen kudeaketa hobetzea eta sektoreko enpresen lehiakortasuna, prestakuntza eta digitalizazioa sendotzea.
Urrats horiek egiteko, Baskegurreko zuzendari nagusiak nabarmendu du «funtsezkoa» dela sektorearen eta erakundeen arteko lankidetza: «Basoen kudeaketan eta ikerketan aurrerapausoak egiteko tresnak ditugu; orain, profesionalei aukera eman behar diegu ezagutza eta segurtasun handiagoarekin lan egiteko».
Zuraren erakusleiho
Egurtek zuraren inguruko nazioarteko foroa ere antolatu du Baskegurrek. Bi urtean behin antolatzen dute, eta Barakaldoko BEC erakustazokan egingo dute (Bizkaia), asteazkenean eta ostegunean. Sektoreko enpresak biltzen dira han, eta baita arkitekturaren eta ingeniaritzaren arloko profesionalak ere, besteak beste.
