Ostiralean sinatuko dute Nafarroako Volkswagenen X. hitzarmena enpresak, UGTk eta CCOOk. Ustez, aste honetarako langileen artean zuzendaritzak eta batzordeak hitzartutako akordioari buruzko erreferendum bat zen deitzekoa, baina azkenean ez da egingo.
Gaur bildu da langile batzordea gai hori aztertzeko. Aurreko astean adierazi bezala, UGTk eta CCOOk proposatu dute langileen artean kontsultatzea aurreakordioari buruz, eta horren emaitza sinatzera behartu nahi zituzten batzordeko beste hiru sindikatuak. Alta, ELAk, LABek eta CGTk berretsi dute ez dutela proposamen hori onartuko, eta, aho batez onartu behar zenez, ez da aurrera atera. Ondorioz, aurreko astean hitzartutako aurreakordioa onartutzat ematen da. Berez hala egin izan da historikoki.
Ikusi gehiago:VWeko aurreakordioa azaltzeko batzarrera deitu dute UGTk eta CCOOk
ELAk, LABek eta CGTk ohar bateratua atera dute: «Proposamena egin dute jakinik beste sindikatuok ez genuela onartuko». Sindikatuok ez dute nahi inork akordio hori sinatzera behartzea: «Ados ez gauden puntu asko dauzka, eta beste gai askori buruz ez da hitz egiten», arrazoitu dute. Haien ustez, langile batzordean gehiengoa duten bi sindikatuen proposamena «aitzakia besterik ez da enpresarekin lortutako akordioa erreferendumera ez eramateko».
CCOOk ohar bat kaleratu du defendatzeko ostiralean akordioa izenpetuko dutela «lantokiaren etorkizuna lehenesten eta bermatzen duelako». Nahiz eta VWek iragarri urte eta erdiz laurehun lanpostu «sobran» egongo direla, aurreakordioak ez du zehazten oraingoz nola utziko duten langileek enpresa. Dena den, CCOOko Carlos Zalduendoren arabera, VWek bermatu du 2026tik aurrera enplegua berreskuratuko dela. Baimenen inguruko legediaren ondorioz, kontratu mugagabeak egingo direla nabarmendu du. Azkenik, soldata KPIa adina igoko da hiru urtez, eta 900 euroko sariak pagatuko zaizkie langileei lan itunak iraungo duen hiru urteetan (2024-2026).
Larunbatean, CCOOk eta UGTk batzar bat egin zuten aurreakordioaren berri emateko langileei, baina oso gutxi joan ziren. Batzar hori modu bat izan zitekeen ikusteko nola hartzen zen erreferendumaren aukera enpresa barruan. Azkenean, gaurko bileran aztertu da gaia.
