Eroskiren Elorrioko (Bizkaia) biltegian greba hasi dute gaur, eta, ELAk adierazi duenaren arabera, %100eko erantzuna izan du deialdiak. Enpresa batzorde osoak deitu du grebara —ELAko sei delegatuek eta LABeko hirurek—, eta larunbatera arte iraungo du, akordiorik lortzen ez badute.
130 langilek egiten dute lan bertan, gehienak «gizon arrazializatuak», ELAren esanetan. Gehienek gutxieneko soldatatik oso gertu dagoen ordainsaria jasotzen dute, Espainiako hitzarmena aplikatzen baitzaie. Hori dela eta, ez dituzte hainbat gehigarri kobratzen —gaueko txandetan edo jaiegunetan lan egiteagatik, esaterako—.
Cecosarena da Elorrioko biltegia, eta freskoak ez diren elikagaiak biltzen eta banatzen dizkie Hego Euskal Herriko eta Espainia iparraldeko eskualdeetako Eroski supermerkatuei.
